दक्षिण कोरियाका विपक्षी दलका नेता लीमाथि छुरा प्रहार

काठमाडाै‌, १७ पुस । दक्षिण कोरियाकाे विपक्षी दलका नेता ली जे म्युङमाथि छुरा प्रहार भएको छ ।

कोरियाली समाचार एजेन्सीका अनुसार पत्रकारहरुसँग कुरा गरिरहेका बेला नेता ली जे म्युङमाथि छुरा प्रहार भएको हाे । एजेन्सीका अनुसार आक्रमणकारीलाई बुसानस्थित घटनास्थलबाटै पक्राउ गरिएको छ ।

विपक्षी दलका नेता ली जे म्युङ दक्षिणी बन्दरगाह सहर बुसानको भ्रमणमा रहेको बेला आक्रमण भएको योनहाप समाचार एजेन्सीले जनाएको छ ।

लीलाई एक अज्ञात व्यक्तिले घाँटीको देब्रे भागमा छुरा प्रहार गरेका हुन् । लीको अटोग्राफ माग्दै उनी नजिक पुगेका थिए । त्यसपछि अचानक अगाडि बढेर उनीमाथि आक्रमण भएको अन्तर्राष्ट्रिय सञ्चारमाध्यमहरुले जनाएका छन् ।

उनलाई अहिले अस्पताल पुर्याइएको छ । उनी होसमा रहेको उनको पार्टी डेमेक्र्याटीक पार्टीका अधिकारीहरूले जनाएका छन् ।