जनतासँगसँगै चितवनको एमालेः जिल्लाका सबै पालिका, वडा र टोलसम्म अभियान

चितवन, चैत १९ । निर्वाचनका बेला मात्रै नेताहरु जनताको घरदैलोमा आइपुग्छन् । त्यसपछि अर्को निर्वाचनमा मात्रै देख्न सकिन्छ भन्ने भाष्यलाई चिर्दै अहिले नेकपा (एमाले) चितवनले ‘जनतासँग एमाले’ अभियान सञ्चालन गरिरहेको छ ।

कुनै समय एमालेको राम्रो प्रभाव रहेको चितवन पछिल्लो निर्वाचन भने त्यति फलदायी देखिएको छैन । ०७९ को निर्वाचनमा समेत चिवनमा एमालेले राम्रो सफलता प्राप्त गर्न सकेन । जनतामा फैलिएको निरासालाई कम गर्ने र जनतासँगसँगै हिँड्ने अभियान अनुरुप फागुन १५ गतेबाट एमालेले डेढ महिने अभियान सुरुवात गरेको हो । यो अभियान चैत मसान्तसम्म चल्ने छ ।

जिल्लाका सबै पालिका, वडा र टोलहरुमा अभियान अन्तर्गत विभिन्न कार्यक्रमहरु भइरहेको चितवन एमालेले जानकारी दिएको छ । ‘यो अभियानले चितवनमा एमाले लहर ल्याएको छ,’ नेकपा (एमाले) चितवनका अध्यक्ष रामप्रसाद न्यौपानेले भन्नुभयो, ‘जिल्लाका ९८ वटै वडामा अभियानको वडा संयोजक र सहसंयोजकहरु तोकेर जिम्मेवारी प्रदान गरी जिल्ला पार्टी नेतृत्वले कार्यक्षेत्रमा खटाएको छ । उनीहरुले टोलटोलमा पुगेर त्यहाँका नेतृत्वलाई कार्य विभाजन गराई अभियान चलाइरहेका छन् ।’

अध्यक्ष न्यौपानेका अनुसार जनतासँग एमाले अभियान अन्तर्गत जनप्रतिनिधि र पार्टीबीचको अन्तर सम्बन्धलाई मजबुत पार्ने खालका विभिन्न कार्यक्रम, एक वडा एक रचनात्मक कार्यक्रम सञ्चालन, पार्टी सदस्यता नवीकरण, नयाँ पार्टी सदस्यता वितरण, वडा स्तरमा प्रशिक्षण कार्यक्रम, टोल एवम् वडा कमिटीहरु गठन पुनःगठन गर्ने कामहरु भइरहेका छन् ।

यसैगरी स्थानीय स्तरमा भइरहेका विकास निर्माणको अवस्थाका बारेमा जानकारी लिएर आइपरेका समस्याहरुको समाधानका लागि स्थानीय पार्टी कमिटीले पहल कदमी लिने, जनजीविकाका सवाललाई एमालेले उठाउने जस्ता विषयहरुका बारेमा अभियानका क्रममा जनतालाई सुसूचीत गराउने, वार्ड स्तरमा रहेका संघ संस्थाहरुको विवरण, रोजगारीको अवस्था, वैदेशिक रोजगारी लगायतका विषयमा जानकारी लिने काम अभियान अन्तर्गत भइरहेको अध्यक्ष न्यौपानेले जानकारी दिनुभयो । यस अभियानले पार्टी संगठनलाई मजबुत बनाउँदै लैजाने र पार्टी शुद्धिकरण एवम् सुदृढीकरणका लागि कोसेढुङ्गा साबित हुने विश्वास सिंगो पार्टी कमिटीले लिएको छ । साथै यसले एमालेलाई वडा वडामा क्रियाशील गराएर जनतासँग जोड्न प्रभावकारी भूमिका खेल्ने पार्टी कमिटीको विश्वास छ ।