कर्मचारीमा काम नगर्ने मनोविज्ञान अधिक : अनुगमन टोली

maitrinews

 

जनकपुरधाम। सरकारी कर्मचारीमा अतिरिक्त रकम नलिई कुनै पनि काम नगर्ने मनोविज्ञानले गर्दा सेवा प्रवाह जटिल बनेको एक अनुगमनको तथ्य सार्वजनिक गरिएको छ ।

सरकारद्वारा गठित केन्द्रीय अनुगमन र निरीक्षण समितिका टोलीले विभिन्न जिल्लामा विकास आयोजनाको अनुगमन, सेवा प्रवाहको अवस्थाबारे जानकारी गराउँदै उक्त तथ्य सार्वजनिक गरेका हुन् ।

चिनेको र नचिनेको सेवाग्राहीद्वारा छलफलका क्रममा यस्तो गुनासो अधिक पाइएको पनि टोलीका पदाधिकारीले बताउनुभयो । कर्मचारीमा कामभन्दा पनि जागिर खाने मानसिकताले विकास आयोजनामा विनियोजन गरिएको रकम खर्च नहुने समस्यामा वृद्धि भएको पाइएको छ ।

कर्मचारीमा ऐन, कानुनभन्दा पनि कार्य सम्पादन गर्दा सेवाग्राहीलाई दुःख दिने र अतिरिक्त रकम लिने चलनले सेवा प्रवाह स्वच्छ हुन सकेको छैन ।

जनकपुरधाममा आज आयोजित धनुषा, महोत्तरी, सर्लाही र सिन्धुली जिल्लाका विकास आयोजना र सरकारी कार्यालयका प्रमुखसँग छलफलका क्रममा प्रधानमन्त्री कार्यालय सचिव टङ्कमणि आचार्यले विकास योजनामा रकम विनियोजन गरिएको छ तर रकम खर्च हुन नसकेको अवस्था चिन्ताजनक रहेको बताउनुभयो ।

कर्मचारीमा कामभन्दा पनि अन्य कुरासँग अधिक सरोकार राख्ने बानीका कारण विकास योजनाको प्रगति सन्तोषजनक नभएको उदाहरण उहाँले प्रस्तुत गनुभयो ।

मध्यमाञ्चल क्षेत्रीय प्रशासक शम्भुप्रसाद कोइरालाले शक्ति प्रयोग गर्ने कुरा कथाझैँ भएको अवस्थामा सेवामा सहजीकरण गर्नु जरूरी छ, भन्नुभयो ।

विनियोजन गरिएको रकमको उपलब्धि र सेवा प्रवाहको नतिजालाई राम्रो गर्न कर्मचारीमा उत्तरदायी भावनाप्रति अग्रसरताको कमी देखापर्नु सबैका लागि चिन्ताको विषय भएको उहाँले बताउनुभयो ।

धनुषा जिल्लाका प्रमुख जिल्ला अधिकारी दिलीप चापागार्इंले साधनस्रोतका अभावका कारणले पनि कार्य सम्पादनमा समस्या भइरहेकोतर्फ ध्यानाकर्षण गराउनुभयो ।