आमालाई मार्न १२ लाख दिने गरी छोरीले नै खटाइन् अपराधी

maitrinews

 

काठमाडौँ । आइतबार भक्तपुरको चाँगुनारायण नगरपालिका–७ बाँसबारीमा ६१ वर्षीय सावित्री भट्टराईको हत्या मृतककी छोरीको योजनाअनुसार भएको खुल्न आएको छ ।
महानगरीय अपराध महाशाखाले आज पत्रकार सम्मेलन गरी आइतबार दिउँसो घाँटी रेटेर हत्या गरिएकी भट्टराईको मृतककी छोरी ईश्वरी भट्टराईको योजनाअनुसार भएको बताएको हो ।

प्रहरीले हत्यामा संलग्न सिरहा कल्याणपुर नगरपालिका–४ का मोहम्मद नौसाद, भारतीय नागरिक अर्जुन कुमार भन्ने भोला कुमार, भारतकै मोहम्मद रहिश र मृतककी छोरी ईश्वरीलाई पक्राउ गरेको हो

। प्रहरीले नौसादलाई धादिङको गजुरीबाट आइतबार साँझ सात बजे र भोला कुमार र मोहम्मद रहिसलाई राति तीन बजे मकवानपुरबाट पक्राउ गरी सार्वजनिक गरेको हो । मृतककी छोरीलाई भने भक्तपुरबाट पक्राउ गरिएको हो ।

पत्रकार सम्मेलनमा महाशाखाका प्रमुख, प्रहरी वरिष्ठ उपरीक्षक सहकुल थापाले मृतककी छोरी ईश्वरीले आफ्ना प्रेमी नौसादसँग भएको प्रेम सम्बन्धबारे आमाले थाहा पाउने र आफ्नो प्रेममा आमाले विरोध गर्ने डरले आमालाई मार्ने योजना बनाएको अनुसन्धानमा खुलेको बताउनुभयो ।

“आमालाई मार्नका लागि ईश्वरीले रु १२ लाख दिने सहमतिअनुसार नौसादले एक्लै मार्न नसक्ने भएकाले भारतबाट साथी बोलाएर हत्या गरेको अनुसन्धानमा खुलेको छ”, उहाँले भन्नुभयो ।

सावित्राको आइतबार दिउँसो चाँगुनारायण–७ स्थित घरमा हत्या भएको थियो । श्रीमान्ले दोस्रो विवाह गरेपछि सावित्रा आफ्ना कान्छी छोरी ईश्वरीसँग बस्दै आएकी थिइन् ।

विवाहित ईश्वरी सिराहा घर भइ भक्तपुर बस्दै आएका मोहम्मद नौशादसँग प्रेम सम्बन्धमा थिइन् । गार्मेन्ट उद्योगमा काम गर्ने क्रममा ईश्वरी र नौशाद प्रेममा परेका थिए ।

प्रहरीका अनुसार सावित्राले ईश्वरी र नौशादबीचको सम्बन्ध थाहा पाइसकेकी थिइन् । ईश्वरीको विवाहेत्तर सम्बधनका विषयमा साबित्रा र ईश्वरीबीच पटक पटक झगडा समेत हुने गरेको थियो ।

तर, ईश्वरीले भने प्रेमीको साथ नछाड्ने अडान लिँदै आएकी थिइन् । आमाले आफ्नो प्रेम सार्वजनिक गरिदिने डरका कारण ईश्वरीकै योजनामा आइतबार दिउँसो चक्कुले घाँटी रेटेर साबित्राको हत्या भएको थियो ।

घटनामा संलग्नमध्ये भोला कुमारले हात समाउने, मोहम्मद नौसादले मुख थुन्ने र मोहम्मद रहिसले घाँटी रेटेको अनुसन्धानमा खुलेको थापाले बताउनुभयो । मृतककी छोरी ईश्वरी र मोहम्मद नौसाद केही समय पहिला एउटै गार्मेन्टमा काम गर्दा प्रेम सम्बन्ध भएको महाशाखाले जनाएको छ ।