बागमती प्रदेश सरकारविरुद्ध अविश्वास प्रस्ताव दर्ता, तीन मन्त्रीद्वारा राजीनामा

maitrinews

 

हेटौँडा । बागमती प्रदेश सरकारविरुद्ध प्रदेश सभा सचिवालयमा अविश्वास प्रस्ताव दर्ता भएको छ ।
संसदीय दलका उपनेता एवं आन्तरिक मामिला तथा कानुनमन्त्री शालिकराम जमकट्टेलको प्रस्तावमा नेपाल कम्युनिष्ट पार्टी पुष्पकमल दाहाल प्रचण्ड र माधवकुमार नेपाल पक्षधर सांसदहरुले शुक्रबार बिहान मुख्यमन्त्री डोरमणि पौडेलविरुद्ध अविश्वासको प्रस्ताव दर्ता गराउनुभएको हो । अविश्वासको प्रस्तावमा ४५ जना सांसदले हस्ताक्षर गर्नुभएको हस्ताक्षरकर्ता सांसद ओमबहादुर ग्लानले जानकारी दिनुभयो ।
संसद सचिवालयमा ४५ जना सांसदले हस्ताक्षर गरेको अविश्वासको प्रस्ताव दर्ता भएको जानकारी दिएको छ । शुक्रबार बिहान ११ः२५ बजे सरकारविरुद्ध अविश्वासको प्रस्ताव दर्ता भएको सचिवालय स्रोतले जानकारी दिएको छ ।
यसैबीच बागमती प्रदेश सरकारका आन्तरिक मामिला तथा कानूनमन्त्री शालिकराम जमकट्टेल, उद्योग, पर्यटन, वन तथा वातावरण मन्त्री अरुण नेपाल र सामाजिक विकास मन्त्री युवराज दुलालले मुख्यमन्त्रीसमक्ष राजीनामा दिनुभएको छ । सामूहिक राजीनामा पत्रमा प्रदेश सरकार कामकारबाही र दिशाविहीन हुनुमा मुख्यमन्त्री डोरमणि पौडेलको सुस्त कार्यशैली रहेको औल्याइएको छ ।