काठमाडौँमा मेलम्ची पानी वितरणको तयारी, ढलमा समस्या नहुने

maitrinews

 

काठमाडौंं । प्रधानमन्त्री केपी ओलीले अबको चार दिनमै काठमाडौंमा मेलम्चीको पानी वितरण हुने बताउनुभएको छ ।
अबको चार दिनमा मेलम्चीको पानी काठमाडौँमा वितरण गरिने जानकारी दिनुभएको हो । उहाँले तत्काल पाइप नफुटोस् भनेर चरणबद्ध ढंगले पानी वितरण गरिने तयारी भईरहेको बताउनुभयो ।

‘अब चार दिनपछि हामी काठमाडौंमा धारामा मेलम्चीको पानी वितरण गर्दैछौँ’, प्रधानमन्त्रीले भन्नुभयो, ‘ १५ गते हामी मेलम्चीको पानी वितरण गर्न सुरु गछौँ र फेजवाइज त्यसलाई बढाउँदै लान्छौँ । कुनै दुर्घटना नहोस् । कुनै पाइप नफुटोस् भनेर हेरिहेरी हामी पानी वितरण गछौँ ।’

उहाँले मेलम्चीको पानी ल्याउनु महत्वपूर्ण उपलब्धि भएको समेत उल्लेख गर्नुभयो ।

यसैबीच मेलम्चीको पानी काठमाडौँमा वितरण गरिएपछि ढल व्यवस्थापनमा समस्या नहुने काठमाडौँ उपत्यका खानेपानी लिमिटेड केयूकेएलले जनाएको छ ।
मेलम्चीबाट दैनिक १७ करोड लिटर पानी आउनेछ । घरघरमा पठाएको पानीको करिब ८० प्रतिशत पानी उपभोगपछि ढलमा जानेछ । पानीको मात्रा बढ्ने भएकाले ढल भरिएर सडकमै बग्न सक्ने भएकाले त्यसको व्यवस्थापन गरिएको केयूकेएलले जनाएको छ । केयूकेएलका प्रमुख कार्यकारी अधिकृत मिलन शाक्यले भन्नुभयो, “ढल व्यवस्थापनमा समस्या हँुदैन । वर्षात् जस्तो पनि हुँदैन । परीक्षणमा नियन्त्रित रूपले पानी पठाइन्छ । ढल सफा गरिरहेका छौँ । जहाँ समस्या आउँछ त्यहाँ समाधान गर्दै जाने हो । हामी तयारी अवस्थामा छौँ ।”
मेलम्ची खानेपानी उपआयोजना–२ आयोजना निर्देशनालयका उपनिर्देशक उज्ज्वल प्रजापतीले मेलम्चीको पानी वितरण गर्नसकिने अवस्थामा रहेको जानकारी दिनुभयो । उहाँले भन्नुभयो, “पुरानो वितरण प्रणालीलाई पनि मर्मत गरी तयारी अवस्थामा राखिएकाले हालकै अवस्थामा मेलम्चीको पानी वितरण गर्न सकिन्छ, त्योभन्दा पहिल्यै परीक्षण हुने भएकाले ठूलो समस्या पर्दैन ।”
निर्देशनालयका अनुसार चक्रपथ भित्रको वितरण प्रणालीलाई पहिलो चरणमा सम्पन्न गरिएको छ । दोस्रो चरणको वितरण प्रणाली चक्रपथ बाहिर हुनेछ । चक्रपथ बाहिरको क्षेत्रलाई याङ्री र लार्के खोलाको पानी थप हुँदासम्म पाइपलाइन विस्तार भइसक्नेछ । मेलम्चीको सुरुङ परीक्षणका लागि पानी पथान्तरण भइरहेको छ । सफल परीक्षणपछि सुन्दरीजलमा पानी आउनेछ । सुन्दरीजलमा आएको पानीलाई प्रशोधन केन्द्रबाट चक्रपथका विभिन्न पानी ट्याङ्कीमा पु¥याएर वितरण प्रणालीबाट घरघरको धारामा पठाइनेछ । मेलम्चीको पानी आएपछि पहिलो चरणमा प्रसारण लाइन र पाइपलाइन परीक्षण गरिनेछ । करिब एक हप्ताको परीक्षणपछि नियमित रूपमा पानी वितरण हुनेछ । मेलम्चीको पानी घरघरमा वितरण गर्ने पाइपलाइन विस्तार तथा मर्मत गरी तयारी अवस्थामा राखिएको निर्देशनालयले जनाएको छ ।