राजकुमार लेखीसहित ५५ जना एमाले प्रवेश

maitrinews

 

काठमाडौं । नेपाल आदिवासी जनजाति महासंघका पूर्वअध्यक्ष राजकुमार लेखी १० वर्षपछि एमालेमै प्रवेश गर्नुभएको छ ।

दुई दिनअघि मात्रै लोकतान्त्रिक समाजवादी पार्टी ९लोसपा० परित्याग गर्नुभएका लेखी गोदावारीमा भइरहेको विधान महाधिवेशनबाट एमाले प्रवेश गर्नुभएको हो । लेखीसहितको ५५ जनाको समूहलाई एमाले अध्यक्ष केपी शर्मा ओलीलगायत शीर्ष नेताले स्वागत गर्नुभएको छ ।

लेखीले २०४० सालदेखि एमालेको विद्यार्थी संगठनमा काम गर्नुभएको थियो ।

वामपन्थी राजनीतिप्रति झुकाव राख्ने लेखीले २०४६ सालपछि नेकपा एमालेबाट सक्रिय राजनीतिमा प्रवेश गर्नुभएको थियो । एमालेमा रहँदा उहाँ काठमाडौं(सप्तरी सम्पर्क मञ्चको अध्यक्ष, एमाले सगरमाथा अञ्चल सम्पर्क कमिटीको सचिव, युवा संघ नेपालको केन्द्रीय सदस्य, युवा संघ नेपालको केन्द्रीय प्रचार विभाग सदस्य, नेकपा एमाले केन्द्रीय समितिको संघीय मामिला विभाग र सम्पर्क वभाग सदस्य, एमाले लोकतान्त्रिक आदिवासी जनजाति महासंघको केन्द्रीय सचिवालय सदस्यको रुपमा काम गर्नुभयो ।

लेखीले २०६८ सालमा एमाले परित्याग गरी नागरिक पार्टी गठन गर्नुभएको थियो । उहाँ २०४६ सालमै थारु कल्याणकारिणी सभाको सदस्य हुनुहुन्थ्यो । थाकसमा उहाँले महामन्त्री, प्रशिक्षण विभाग प्रमुख भएर जिम्मेवारी सम्हालिसक्नुभएको थियो । उहाँले आदिवासी जनजाति महासंघको केन्द्रीय अध्यक्ष भएर पनि काम गरिसक्नुभएको छ ।