प्रमिला कुमारी यादवबाट उपराष्ट्रपति पदको उम्मेदवारी फिर्ता

काठमाडौं, २९ फागुन । प्रमिला कुमारी यादवले आफ्नो उम्मेदवारी फिर्ता लिनुभएको छ । उपराष्ट्रपति चुनावका लागि उम्मेदवारी दिनुभएकी जसपा सांसद प्रमिला कुमारी यादवले आफ्नो उम्मेदवारी फिर्ता लिनुभएको हो । आगामी चैत ३ गते हुने निर्वाचनमा उहाँसँगै रामसहाय प्रसाद यादवको पनि उम्मेदवारी परेको थियो । गठबन्धनका तर्फबाट साझा उम्मेदवारका रुपमा जसपा, नेपालका केन्द्रीय कार्यकारिणी समिति सदस्य तथा प्रतिनिधि सभा सदस्य रामसहाय प्रसाद यादव रहनु भएको छ । यादवले रामसहाय प्रसादलाई समर्थन गर्दै उनले उम्मेदवारी फिर्ता लिनुभएको हो ।

‘मुलुकको सार्वभौमिकता, राष्ट्रिय स्वाधिनता, समावेशीता, संघीय लोकतान्त्रिक गणतन्त्र, सामाजिक न्याय र समाजवाद प्रति निष्ठापूर्वक संधै समर्पित रहने सालीन स्वभावका, सादा जीवन, निष्कलंक एवम् स्वच्छ छवी र उच्च विचार भएका एक बौद्धिक एवम् परिपक्व नेता माननीय रामसहाय प्रसाद यादव, उप–राष्ट्रपति जस्तो गरिमामय पदका लागि सबै भन्दा उपयुक्त, योग्य र सक्षम उम्मेदवार हुनुहुन्छ’, उहाँले जारी गरेको विज्ञप्तिमा भनिएको छ, ‘प्राविधिक रुपमा मेरो नाम उम्मेदवारको सूचीमा रहन गएको भएता पनि प्रतिवद्धताका साथ म वहाँलाई समर्थन गर्दै आफ्नो उम्मेदवारी फिर्ता लिएको घोषणा गर्दछु।’

उहाँले रामसहाय प्रसाद यादव राजनीतिक, आर्थिक र सामाजिक(सांस्कृतिक रुपले समाजको अग्रगामी रुपान्तरण र परिवर्तनको संघर्ष सँगै शोषण, उत्पीडन, असमानता र विभेदका विरुद्ध जनआन्दोलन, ऐतिहासिक मधेश जनबिद्रोह लगायत लोकतन्त्र बहालिका लागि पटक–पटक भएका बिभिन्न आन्दोलनहरुमा नेतृत्वदायी भूमिका निर्वाह गरेको भन्दै उहाँले आफू पछि हटेको बताउनु भएको छ । ‘अब उपरान्त म उप–राष्ट्रपति पदको लागि उम्मेदवार नरहेको हुँदा गठबन्धनका तर्फबाट साझा उम्मेदवार रहनु भएका माननीय रामसहाय प्रसाद यादवलाई आफ्नो अमूल्य मत दिई विजयी गराउनु हुन सम्पूर्ण माननीय सांसद एवम् माननीय प्रदेश सभा सदस्यज्यूहरुसँग हार्दिक अपिल गर्दछु,’ उहाँले भन्नुभएको छ ।