सिमलताल बस दुर्घटनाः २ सय मिटर गहिराइसम्म हेर्न मिल्ने डिभाईस प्रयोग

काठमाडौं, ३१ असार । असार २८ गते शुक्रबारदेखि त्रिशुलीमा हराइरहेको बस र यात्रुको खोजीका लागि सोमबार बिहानबाट उच्च प्रविधिको सोनार डिभाईस प्रयोग गरिएको छ । सशस्त्र प्रहरी बल नेपाल प्रधान कार्यालय हलचोकबाट आइतबार कुरिनटार लगिएको सो डिभाईस मार्फत खोजीकार्य शुरु गरिएको सशस्त्र प्रहरीका सहप्रवक्ता डीएसपी शैलेन्द्र थापाले जानकारी दिनुभयो ।

नेपालमा भएका मध्ये उच्चस्तरको मानिने सोनार प्रविधि पानीमुनि साउण्ड वेभ पठाई त्यहाँ रहेका बस्तुहरुलाई स्क्यान गरी आकृतिको रुपमा देखाउने प्रविधि हो । यसअघि पनि सशस्त्र प्रहरी बल नेपाल विपद् व्यवस्थापन तालिम शिक्षालय कुरिनटारबाट सो प्रविधि प्रयोग गरिएको भएपनि त्यसको क्षमता कम भएकोले अपेक्षाकृत परिणाम प्राप्त हुन सकेको थिएन । तर सोमबार प्रयोग गरिएको सोनार डिभाईस उच्चतम प्रविधिको साधन रहेको र यसको क्षमता २ सय मिटर गहिराइसम्मको जुनसुकै बस्तु पनि पत्ता लगाउने रहेको छ ।

धमिलो पानीमा पनि काम गर्नसक्ने प्रभावकारी मानिएको यो प्रविधिबाट पानीमा फालिएको साउण्ड वेभ तलसम्म रहेका बस्तुसम्म पुगेर स्क्यान गरी आकृतिको रुपमा फिर्ता हुने प्रकारको रहेको छ । मोटर बोटमा जडान गरी लामो दुरीको क्षेत्रफलमा पानीमुनि रहेका सम्पूर्ण वस्तुहरुको आकृति कम्प्युटरमा हेर्न सकिन्छ । यो प्रविधिबाट सफलता मिल्ने विश्वस समेत सशस्त्र प्रहरी बल नेपाल मुख्यालयले लिएको छ ।