दार्चुलामा जीप दुर्घटना, सात जनाको मृत्यु, छ जनाको अवस्था गम्भीर

दार्चुला, ३० कात्तिक । दार्चुलामा जीप दुर्घटना हुँदा सात जनाको घटनास्थलमा नै मृत्यु भएको छ भने अन्य छ जना गम्भीर घाइते भएका छन् ।

मालिकार्जुन जात्राबाट गोकुलेस्वरतर्फ गइरहेको म१ज ३३८ नम्बरको जीप आज बिहान ४ बजे शैल्यशिखर नगरपालिका–५ मा पर्ने सिराडको खोलामा दुर्घटना भएको हो ।

दार्चुलाका प्रहरी नायब उपरीक्षक प्रकाश दाहालका अनुसार दार्चुलाको शैल्यशिखर नगरपालिका–५ लेकगाउँका ३० वर्षीय वीरेन्द्र रावल, सोही ठाउँका २८ वर्षीय शान्ति रावल, शैल्यशिखर–९ नकतडका ४५ वर्षीय दिलीप विष्ट, बैतडीको डिलाशैनी–५ का १५ वर्षीय सञ्जीव बोहरा र भारतको उत्तर प्रदेश विजनौर जिल्लाका ४५ वर्षीय मोहमद सफिर र सोही जिल्लाका १८ वर्षीय मोहमद बसिमको मृत्यु भएको छ । एकजनाको परिचय खुल्न नसकेकाे प्रहरीले जनाएकाे छ ।

जात्रा हेरेर फर्किएकाहरु सवार दुर्घटनामा परेकाे प्रहरीकाे भनाइ छ । घाइते सबैको अवस्था गम्भीर रहेको जानकारी दिँदै घाइतेहरूलाई गोकुलेस्वर अस्पताल पठाइएको प्रहरीले जनाएकाे छ ।