एमाले सचिवालय बैठकमा सचिवालय सदस्यहरुले बोल्ने क्रम सकियो अब अध्यक्षको पालो

काठमाडौँ, १० जेठ । नेकपा (एमाले) को जारी सचिवालयको बैठकमा अध्यक्ष बाहेक नेताहरुले बोल्ने क्रम सकिएको छ । तीन दिन अघि सुरु भएको बैठकमा केन्द्रीय सचिवालयका सबै नेताहरुले लामो समय लिएर मन्तव्य राखेका छन् ।

आजको बैठकमा सचिवहरु यामलाल कडेंल,शेरधन राई,भानुभक्त ढकाल र खगराज अधिकारीले आफ्नो धारणा राख्नुभएको थियो । आज बोल्ने नेताहरुले नेतृत्वमा देखिएका केही कार्यशैलीगत समस्यालाई सुधारेर अघि बढ्नुपर्ने धारणा राखेको एक पदाधिकारीले जानकारी दिए । उनका अनुसार अहिले खाजा ब्रेक भएको छ । त्यसपछि अध्यक्ष ओलीले नेताहरुले उठाएका प्रश्नको विस्तृत जवाफ दिने कार्यक्रम छ । अध्यक्षको सम्बोधन पछि मात्र अस्ती ८ गते तय गरेका एजेण्डामा प्रवेश गरिने ति नेताले बताए ।