दशैंअघिको अन्तिम कारोबार उकालाे लाग्याे शेयर बजार

काठमाडौं, १३ असोज । दशैं अगाडिको अन्तिम कारोबार दिन सेयर बजार उकालाे लागेर बन्द भएकाे छ । मंगलबारदेखि बढ्न सुरु भएको नेप्से लगातार तेस्रो दिन पनि बढेको हो ।

नेप्से बढेपनि कारोबार रकममा भने खासै उत्साह देखिंदैन । चाडपर्वकै कारण लगानीकर्ता निष्क्रिय बन्दा खरिद र बिक्री अर्डर दुवै घटेको छ । बुधबार ४८ करोडमा झरेको कारोबार रकम बिहीबार केही बढेको छ । बिहीबार बजारमा १७ लाख ९१ हजार ४८० कित्ता सेयर कारोबार हुँदा ६३ करोड २७ लाख ७ हजार ६२८ रुपैयाँको कारोबार भएको छ ।

नेपाल इन्स्योरेन्सको संस्थापक सेयर सर्वाधिक ४ करोड ८५ लाख ५० हजारको कारोबार हुँदा नबिल बैंकको २ करोड ९० लाख ८७ हजार र नेपाल दूरसञ्चार कम्पनीको २ करोड ६२ लाख ९६ हजारको कारोबार भएको छ ।

बिहीबार बजारमा कुल १८६ कम्पनीको सेयर कारोबार हुँदा १२४ कम्पनीको सेयर मूल्य बढेको छ । त्यस्तै ४७ कम्पनीको सेयरमूल्य गिरावट हुँदा ५ कम्पनीको सेयर मूल्य भने स्थिर छ । जसमध्ये अभियान लघुवित्तको सेयर मूल्य सवार्धिक ९.९८ प्रतिशतले वृद्धि भएर सकारात्मक सर्किट मूल्यमा बन्द भएको छ ।