पर्साका सहायक प्रिन्सिपलले गरे विद्यार्थीको अपहरण पश्चात हत्या

पर्सा, १३ पुस । पर्साको एक विद्यालयका सहायक प्रिन्सिपलले आफ्नै विद्यार्थीको अपहरण पश्चात हत्या गरेको पुष्टि भएको छ ।

वीरगन्ज महानगरपालिका २५ सिर्सिया खल्वाटोला बस्ने १४ वर्ष वर्षीय निरजकुमार पासवानको हत्या भएको जिल्ला प्रहरी कार्यालयका डिएसपी दीपक गिरीले जानकारी दिनुभयो।

उनको हत्या गरेको आरोपमा प्रहरीले दुई जनालाई पक्राउ गरी बुधबार सार्वजनिक गरेको छ । पक्राउ पर्नेमा वीरगन्ज १७ अलौ बस्ने २४ वर्षीय कृष्णा भन्ने श्यामप्रसाद यादव र धोबिनी गाउँपालिका १ घोडदौडपिप्रा बस्ने ३० वर्षीय दिलिपकुमार पटेल रहेका छन् ।

१४ वर्षीय निरजकुमार गुरूकुल पन्ना मेमोरिइल ई बोर्डिङ स्कुलमा कक्षा ८ मा अध्ययनरत विद्यार्थी हुन्। दिलिपकुमार पटेल सोही स्कुलका सहायक प्रिन्सिपल समेत हुन्।

मंसिर ५ गते दिउँसो २ बजे उनी हराइरहेका थिए। उनी हराएको भोलिपल्ट उनका बुवा श्रीराम हजरा दुसादले उनको खोजी गरिदिन भन्दै जिल्ला प्रहरी कार्यालय पर्सामा निवेदन समेत दिएका थिए।

निरजकुमार हराएको १२ दिनपछि बुवा श्रीराम हजारालाई अपरिचित नम्बरबाट फोन आएको थियो। फोनमार्फत् ५० लाख फिरौती माग गरिएको डिएसपी गिरीले बताए।

‘सामान्य काम गर्ने व्यक्तिलाई यति धेरै रकम माग गरियो। प्रहरीलाई भन्यो भने छोरालाई मारिदिन्छु पनि भनेका रहेछन्,’ उनले भने, ‘तुरून्तै उहाँहरू प्रहरीकहाँ आएनन्। केही समयपछि मात्रै प्रहरीलाई खबर गरिएको थियो।’

शंकास्पद व्यक्तिहरूमाथि सोधपुछ गर्ने क्रममा प्रहरीले श्यामप्रसादलाई नियन्त्रणमा लियो। उनीमाथि सोधपुछ गर्नेक्रममा प्रहरीले निरजकुमारको शव कहाँ छ भन्ने पत्ता लाग्यो।

निरजकुमारको शव आइतबार साँझ ५ बजे उनी पढ्ने स्कुलकै सेप्टिक ट्यांकीभित्र फेला परेको हो। बालकको शवलाई उनीहरूले घाँटी र खुट्टा बाँधेर पोको पारेर ट्यांकीभित्र राखिएको अवस्थामा फेला परेको हो।

श्यामप्रसादमाथि थप सोधपुछ गर्ने क्रममा सोही विद्यालयकै सहायक प्रिन्‍सिपल दिलिपकुमारको पनि संलग्‍नता रहेको खुल्यो। उनलाई प्रहरीले मंगलबार पक्राउ गरेको हो। यस घटनामा संलग्न अर्का वक्ति फरार छन्। नाबालिगलाई बलात्कार आरोप लागेका श्यामकुमारको योजना रहेको डिएसपी गिरीले बताउनु भयाे ।

उनले दिलिपकुमारबाट केही समय अगाडि पैसा लिएका थिए। तर उक्त रकम तिर्न सकिरहेका थिएनन्। तिर्न नसकेपछि अपहरण गरी फिरौती माग्न सकिने योजना बनाएका थिए।

‘श्यामप्रसादले दिलिपको पैसा चलाएको रहेछ। तर त्यो पैसा फस्यो फिर्ता पनि गर्न सकेनन्। फेरि दिलिपले मागेको माग्यै गरेका रहेछन्। त्यसपछि बरू सँगै मिलेर पैसा आउने काम गरौं न भनेर श्यामप्रसादले सल्लाह गरे। केटालाई बन्धक बनाएर फिरौती लिन  शिक्षकले आफ्नै विद्यार्थीलाई बन्धक बनाउने योजना बनाए,’ उनले भने।

उनीहरूले निरजकुमारलाई निशाना बनाएका थिए। त्यसदिन दिलिपकुमारले निरजकुमारलाई फोन गरी आफ्नो कोठा नजिकै बोलाए। त्यहाँ पेटीले उनको हात, खुट्टा, मुख बाँधेर राखे। उनीहरूले बन्धक बनाएर परिवारसँग फिरौती माग्ने योजना बनाइरहेका थिए।तर निरजकुमारले बल प्रयोग गरिरहे। उनले फुत्किने प्रयास गरेको डिएसपी गिरीले बताउनु भयाे। त्यसो हुँदा निरजकुमार भागेर जाँदा आफूहरूको पहिचान समेत खुल्ने उनीहरूमा डर थियो।

‘विद्यालयकै सहायक प्रिन्सिपल समेत रहेका दिलिपलाई पनि डर भयो। भागेर गयो भने बेइज्जत हुने भनेपछि उनीहरूले हत्या गरे,’ उनले भने।

उनीहरूले निरजकुमारलाई अपहरण गरेकै दिन घाँटी थिचेर हत्या गरे। हत्या गरेर उनीहरूले शवलाई स्कुलकै सेप्टिक ट्यांकीमा  राखिसकेका थिए। तर यसबारे लामो समयसम्म पनि हल्ला भएन। निरजकुमारको शव लामो समयसम्म फेला नपरेपछि श्यामकुमार लगायतले फिरौती पनि माग्नुपर्नेबारे सल्लाह गरे।

‘उनीहरूले हत्या गरेर व्यवस्थापन गरिसकेका थिए। तर कसैले सोधीखोजी पनि गरेनन्। सुरूमा त बन्धन बनाउने बेलामै फुत्किन खोजेपछि हत्या गरिहाले,’ डिएसपी गिरीले भने, ‘तर पछि हल्ला नभएपछि फिरौती माग्न सकिन्छ, पैसा दिई पो हाल्छ कि भन्ने हिसाबले उनीहरूले मागेका हुन्।’

त्यसपछि प्रहरीले अनुसन्धान गरी उनीहरूलाई पक्राउ गरेको हो। पक्राउ परेका दुई जनामाथि कर्तव्य ज्यान मुद्दामा अनुसन्धान भइरहेको जिल्ला प्रहरी कार्यालय पर्साले जनाएको छ।