त्रिभुवन अन्तर्राष्ट्रिय विमानस्थलबाट सुन जस्तो धातु सहित दुई जना पक्राउ
काठमाडौं, २९ माघ । काठमाडौंकाे त्रिभुवन अन्तर्राष्ट्रिय विमानस्थलको आगमन टनेल गेट नजिकैबाट सुन जस्तो धातु सहित दुई जनालाई प्रहरीले पक्राउ गरेकाे छ ।
पक्राउ पर्नेमा दुई भारतीय नागरिक ३१ वर्षीय गिरिश चन्देरलाल थडानी र ३४ वर्षीय मुकेश कुंदन आठवाणी रहेका छन् ।
ईन्डिगो एयरलाईन्सको उडानद्वारा मुम्बईबाट काठमाडौं आएका थडानीको साथबाट २ सय ५० ग्राम र आठवाणीको साथबाट २ सय ५० ग्राम सुनजस्तो देखिने धातु अवैध रुपमा लुकाई छिपाई भन्सार छली गरी लैजान लागेको अवस्थामा फेला पारी प्रहरीले दुवै जनालाई पक्राउ गरेको हो ।
प्रहरीले पक्राउ परेका उनीहरूलाई थप अनुसन्धान गरिरहेको जनाएकाे छ ।
