भक्तपुरमा परालले छोपेको अवस्थामा पुरूष मृत फेला

भक्तपुर, ११ फागुन । भक्तपुरमा परालले छोपेको अवस्थामा एक जना पुरूष मृत फेला परेका छन्।

भक्तपुरकाे सूर्यविनायक नगरपालिका वडा नम्बर ८ सिपाडोलस्थित वडा कार्यालय नजिकैकाे गोठमा एक जना पुरूष मृत फेला परेको हाे ।

जिल्ला प्रहरी परिसर भक्तपुरका डिएसपी बसन्त पाठकले मृतक तेह्रथुम छथर गाउँपालिका वडा नम्बर २ घर भई सूर्यविनायक सिपाडोल बस्ने ३३ वर्षीय गोपालप्रसाद ढकाल रहेकाे जानकारी दिए ।

डिएसपी पाठकका अनुसार मृतककाे शव स्थानीय रोशन बस्नेतको कच्ची इटा र माटोले बनेको दुई तले गोठको भुइँ तलामा परालले छोपेको अवस्थामा रगताम्मे फेला परेको हो। मृतककाे शरीरमा चोट रहेको प्रहरीले जनाएको छ।

मृतक बुधबार राति ८ बजे कोठाबाट तेल किन्न भनेर निस्केकाे र नफर्किएपछि बिहीबार प्रहरी वृत्त जगाती भक्तपुरमा हुलियासहित निवेदन परेको प्रहरीले बताएकाे । यस घटनामा प्रहरी वृत्त जगातीले तालिम प्राप्त कुकुरसहितको टोलीले अनुसन्धान गरिरहेको जनाएकाे छ ।