आक्रामक अभिब्यक्ति दिने दुर्गा प्रसाईं पक्राउ, गेट नखाेलेपछि भर्याङ लगाएर पुगे प्रहरी
भक्तपुर, ६ असाेज । प्रहरीले मेडिकल व्यवसायी दुर्गा प्रसाईंलाई पक्राउ गरेकाे छ ।
साइबर अपराधको मुद्दामा व्युरोबाट खटिएका प्रहरीले प्रसाईंलाई भर्याङ लगाएर घरको कम्पाउण्डमा प्रवेश गरी पक्राउ गरेकाे हाे ।
पक्राउ गर्न गएका प्रहरीलाई प्रसाईंले एक घण्टासम्म पनि ढोका नखोली भित्रबाट अपशब्द प्रयोग गरी गालाैज गरेपछि प्रहरी भर्याङ लगाएर घरको कम्पाउण्डमा प्रवेश गरेको थियो । त्यसक्रममा हातपातमा उत्रिएका प्रसाईंका अंगरक्षकलाईसमेत नियन्त्रणमा लिइएको थियो ।
साइबर व्युरोबाट डीएसपीको नेतृत्वमा गएको प्रहरी टोली, महानगरीय प्रहरी परिसर भक्तपुर र ठिमी वृत्तकाे सहकार्यमा प्रसाईं पक्राउ परेका हुन् ।
प्रसाईसहित उनीसँगै रहने युट्युवरहरु प्रकाशचन्द्र दाहाल र जीवन पाण्डेविरुद्ध साइबर ब्युरोमा परेको उजुरीका आधारमा प्रहरीले गत साता नै जिल्ला अदालत काठमाडौंबाट पक्राउ पुर्जी लिएको थियो ।
रास्वपा केन्द्रीय सदस्य टीका संग्रौलालगायत पीडित महिलाले उनीहरुविरुद्ध साइबर व्युरोमा जाहेरी दिएका थिए ।
