सुनको लोभ र सामान्य विवादमा देवरद्वारा १६ दिनकी सुत्केरी भाउजूको हत्या

धनगढी । कैलालीमा १६ दिने सुत्केरी भाउजूको हत्या गरेको आरोपमा प्रहरीले उनकै देवरलाई पक्राउ गरेको छ। गौरीगंगा नगरपालिका–७, कैलाशपुरकी १९ वर्षीया तुलसी नाथको हत्यामा संलग्न रहेको आरोपमा उनकै २० वर्षीय देवर नवीन नाथलाई पक्राउ गरिएको हो।

भात कम राखेको जस्तो सामान्य विषयमा सुरु भएको विवादले जघन्य अपराधको रूप लिएको प्रहरी अनुसन्धानबाट खुलेको छ।

इलाका प्रहरी कार्यालय मालाखेतीका अनुसार, ३ दिनअघि तुलसी घरनजिकैको नालीमा मृत अवस्थामा फेला परेकी थिइन्। सुरुमा रहस्यमय देखिएको घटनाको अनुसन्धान गर्दै जाँदा पारिवारिक सदस्यकै संलग्नता पुष्टि भएको हो।

घटनाको पृष्ठभूमि र विवाद

घटना भएको दिन दिउँसो तुलसी आफ्नो १६ दिने शिशुलाई खोप लगाएर घर फर्केकी थिइन्। घरमा अरूले खाना खाइसकेका थिए। आफ्नो लागि छुट्याइएको भात थोरै भएको भन्दै उनले गुनासो गरेपछि घरमा सामान्य मनमुटाव भएको थियो।

प्रहरीका अनुसार, मृतक तुलसीका श्रीमान् भारतमा काम गर्छन् र उनले कमाएको पैसा सिधै तुलसीको खातामा पठाउने गर्थे। घरको आर्थिक कारोबार तुलसीले नै हेर्ने हुँदा पैसाको विषयमा देवर नवीन असन्तुष्ट थिए। “भाउजूले आफन्तमाझ ‘केही काम गर्दैन, हामीले पाल्नुपर्छ’ भनेर कुरा लगाउने गरेकोले आफ्नो इज्जतमा धक्का लागेको” नवीनले प्रहरीसमक्ष बयान दिएका छन्।

यसरी खुल्यो हत्याको रहस्य

बिहान तुलसीको शव नालीमा घोप्टो परेको अवस्थामा फेला परेपछि परिवारले प्रहरीलाई खबर गरेको थियो। घटनास्थल पुगेको प्रहरी टोलीले अनुसन्धान सुरु गर्दा परिवारले मृतकले लगाएका सुनका गहना हराएको जानकारी दिए।

तुलसीले कानमा लगाउने ८ वटा सुनका रिङ र खुट्टाको औँलामा लगाउने चाँदीको औँठी शवमा थिएन। इलाका प्रहरी कार्यालय मालाखेतीका डीएसपी रणबहादुर चन्दले भने, “यदि बाहिरी मान्छेले लुटपाट गरेको भए कानमा चोटपटक हुन्थ्यो, तर त्यस्तो केही थिएन। गहना निकै चलाखीपूर्वक निकालिएको देखेपछि हाम्रो शंका घरभित्रै सोझियो।”

प्रहरीले नवीनका बुवामार्फत सोधपुछ गर्न दबाब दिएपछि उनले अपराध स्वीकारेका थिए। नवीनले घरबाहिर गिट्टी थुपारेको ठाउँमा लुकाएको सुन निकालेर दिएपछि हत्याको सम्पूर्ण रहस्य खुलेको हो।

हत्याको स्वीकारोक्ति

नवीनले प्रहरीसमक्ष दिएको बयानअनुसार, राति सबै सुतिसकेपछि उनी भाउजू सुतेको कोठामा गए र पंखाको आवाजको फाइदा उठाउँदै निदाइरहेकी तुलसीको मुख थुनेर हत्या गरे। त्यसपछि उनले कान र खुट्टाका गहना निकालेर शवलाई नालीमा फालिदिएका थिए।

डीएसपी चन्दका अनुसार, घटनामा नवीनको एक्लैको संलग्नता देखिए पनि थप अनुसन्धान जारी छ। मृतक तुलसीको शव पोस्टमार्टमका लागि पठाइएको छ। एउटा सामान्य घरायसी विवादले अन्ततः १६ दिनको शिशुलाई मातृविहीन बनाएको छ।

Leave a Reply

Your email address will not be published. Required fields are marked *