सिन्धुपाल्चोक, १४ असार। सिन्धुपाल्चोकमा एक ११ वर्षीया बालिकाको सामूहिक बलात्कारपछि हत्या भएको अत्यन्तै दर्दनाक र क्रूर घटना सार्वजनिक भएको छ।

असार १० गते भोटेकोशी गाउँपालिका–५ को एक जङ्गलमा शव फेला परेकी बालिकाको हत्यामा संलग्न रहेको आरोपमा प्रहरीले पाँच जनालाई पक्राउ गरी अनुसन्धानलाई निष्कर्षमा पुऱ्याएको छ।

जिल्ला प्रहरी कार्यालय, सिन्धुपाल्चोकका प्रहरी प्रमुख (एसपी) रामेश्वर कार्कीले प्रारम्भिक अनुसन्धानबाट बालिकाको सामूहिक बलात्कारपछि हत्या गरिएको पुष्टि भएको जानकारी दिनुभयो। “यो एक अत्यन्तै संवेदनशील र जघन्य अपराध हो। गहन अनुसन्धानपछि हामीले घटनामा संलग्न ५ जनालाई पक्राउ गर्न सफल भएका छौँ,” एसपी कार्कीले भन्नुभयो।

प्रहरीका अनुसार, असार १० गते स्थानीयले जङ्गलमा बालिकाको शव देखेपछि प्रहरीलाई खबर गरेका थिए। तत्काल घटनास्थल पुगेको प्रहरी टोलीले शवको प्रकृति र प्रारम्भिक अनुसन्धानका आधारमा घटना शङ्कास्पद देखिएपछि गहिरो अनुसन्धान अघि बढाएको थियो।

पक्राउ परेकाहरूको पहिचान र घटनाको विस्तृत विवरण शुक्रबार (आज) पत्रकार सम्मेलनमार्फत सार्वजनिक गरिने प्रहरीले जनाएको छ।