काठमाडौँ, १७ असार । राष्ट्रियसभाको आजको बैठकमा नेपाल नागरिकता (दोस्रो संशोधन) विधेयक, २०८१ सम्बन्धी महत्त्वपूर्ण सन्देश पेश गरिएको छ।

प्रतिनिधिसभाबाट पारित भई प्राप्त भएको उक्त सन्देशलाई राष्ट्रियसभाका सचिव डा. सुरेन्द्र अर्यालले सभासमक्ष टेबुल गर्नुभएको हो। यो सँगै नागरिकता विधेयकमाथि राष्ट्रियसभामा थप प्रक्रिया अघि बढ्ने बाटो खुलेको छ।

यसैगरी, बैठकमा राष्ट्रियसभाका अध्यक्ष नारायणप्रसाद दाहालले मन्त्रिपरिषद् सदस्यहरूको कार्यभार तोकिएको सम्बन्धी पत्रहरूको व्यहोरा पढेर सुनाउनुभएको थियो।

उहाँले विभिन्न कारणले विदेश भ्रमणमा रहनुभएका मन्त्रीहरूको अनुपस्थितिमा उनीहरूको दैनिक प्रशासनिक कार्यभार अन्य मन्त्रीहरूलाई तोकिएको जानकारी सभालाई गराउनुभयो।