गोङ्गबुमा मिटरब्याजी धन्दाको पर्दाफास: घरबाट साढे ४ करोड नगद, सुन र चाँदी बरामद

काठमाडौं, मंगलबार।  काठमाडौंको गोंगबुस्थित एक व्यक्तिको घरबाट स्रोत नखुलेको ठूलो परिमाणमा नगद, सुन र चाँदी बरामद भएको छ। पैसाको गर्जो टार्न गहना धितो राख्ने ग्राहकबाट मिटरब्याजी ब्याज असुल्ने धन्दा चलाएको आरोपमा प्रहरीले गोंगबुबाट ७६ वर्षीय विनोदकुमार श्रेष्ठको घरमा छापा मारेको थियो। मंगलबार गरिएको छापामा ४ करोड २५ लाख ५० हजार रुपैयाँ नगद, करिब १० किलो सुन र ३ किलोभन्दा बढी चाँदी फेला परेको हो।

गोरखा जिल्लाको गोरखा नगरपालिका वडा नम्बर ६, बसपार्क घर भई हाल काठमाडौंको सामाखुशीस्थित गोंगबु क्षेत्रमा बस्दै आएका श्रेष्ठको तीनतले घरको दोस्रो तल्लाको बैठक कोठाबाट प्रहरीले उक्त रकम र गरगहना बरामद गरेको हो। बरामद सामग्रीमा ४ करोड २५ लाख ५० हजार रुपैयाँ नगद, ९८३७.९६ ग्राम सुन र ३२१८.४९२ ग्राम चाँदी रहेको जिल्ला प्रहरी परिसरले जनाएको छ।

प्रारम्भिक अनुसन्धान अनुसार, श्रेष्ठले सुन पसलका सञ्चालकमार्फत गरगहना धितो राख्ने ग्राहकहरूलाई प्रचलित ब्याजदरभन्दा अत्यधिक ब्याज असुल्ने धन्दा चलाउँदै आएका थिए। गरगहना धितो राख्ने ग्राहकहरूलाई सुन पसलेले ती गहना बैंकमा राखिएको जवाफ दिने गरेका थिए। तर, ती ग्राहकका गरगहना भने श्रेष्ठको घरमै भण्डारण गरिने गरेको पाइएको छ।

जिल्ला प्रहरी परिसर, भद्रकालीका प्रवक्ता प्रहरी उपरीक्षक (एसपी) अपिलराज बोहराले यसलाई मिटरब्याजीहरूले ग्राहकका गरगहना व्यक्तिको घरमा भण्डारण गर्ने प्रतिनिधिको घटना भएको बताएका छन्। उनका अनुसार, सर्वसाधारण ग्राहकबाट असुलिएको उच्च ब्याजबापतको रकम श्रेष्ठले बैंकमा नराखी घरमै भण्डारण गर्ने गरेका थिए।

प्रहरीले श्रेष्ठलाई नियन्त्रणमा लिई थप अनुसन्धान गरिरहेको जनाएको छ। यो घटनाले मिटरब्याजी धन्दा र त्यसबाट सर्वसाधारणमाथि भइरहेको आर्थिक शोषणलाई पुनः उजागर गरेको छ।