सिन्धुलीमा बीभत्स घटना: बुहारीमाथि पेट्रोल खन्याएर हत्या गरेको आरोपमा सासू र नन्द पक्राउ

सिन्धुली, ८ पुस । सिन्धुलीको कमलामाई नगरपालिकामा एक महिलाको आगो लगाएर बीभत्स हत्या गरिएको छ। आफ्नै बुहारीलाई पेट्रोल छर्केर आगो लगाई हत्या गरेको आरोपमा प्रहरीले सासू र नन्दलाई पक्राउ गरेको हो।

मृत्यु हुनेमा कमलामाई नगरपालिका–४ धुराफाँटकी ३२ वर्षीया सुशीला घिसिङ रहेकी छन्। आइतबार अपराह्न साढे ४ बजेतिर घरायसी विवादका क्रममा उनलाई जिउँदै जलाइएको प्रहरीको प्रारम्भिक अनुसन्धानले देखाएको छ।

जिल्ला प्रहरी कार्यालय सिन्धुलीका एसपी लालध्वज सुवेदीका अनुसार हत्या आरोपमा ५९ वर्षीया सासू मायारानी बमजन र ३५ वर्षीया नन्द मिना बमजनलाई नियन्त्रणमा लिइएको छ। मृतकका श्रीमान हाल वैदेशिक रोजगारीको सिलसिलामा दक्षिण कोरियामा छन्।

ससुरा पनि घाइते, माइती पक्षको किटानी जाहेरी
घटनामा मृतकका ६५ वर्षीय ससुरा दुर्गामान बमजन पनि घाइते भएका छन्। उनको हाल कीर्तिपुर बर्न अस्पतालमा उपचार भइरहेको छ। उनले आगो निभाउन खोज्दा आफू घाइते भएको दाबी गरे पनि मृतकका माइती पक्षले भने सासू र नन्दसँगै ससुराविरुद्ध पनि किटानी जाहेरी दिएका छन्।

“हामीले घटनास्थलबाट पेट्रोलसहित दुई जनालाई पक्राउ गरेका छौँ,” एसपी सुवेदीले भने, “ससुराको भूमिकाबारे अनुसन्धान भइरहेको छ। वास्तविकता के हो भन्ने कुरा उपचार र बयानपछि खुल्नेछ।”

पाँच दिनको म्याद थप, स्थानीयको प्रदर्शन
पक्राउ परेका दुवै जनालाई जिल्ला अदालत सिन्धुलीबाट पाँच दिनको म्याद थप गरी हिरासतमा राखिएको छ। मृतक सुशीलाको शव पोष्टमार्टमका लागि जिल्ला अस्पताल सिन्धुलीमा राखिएको छ। लामो समयदेखि चल्दै आएको घरायसी कलहले उग्र रूप लिँदा यो दुखद घटना घटेको प्रहरीको अनुमान छ।