आन्तरिक पर्यटन र स्थानीय उत्पादन प्रवर्धन गर्न मुग्लिनमा आजदेखि ‘सुन्तला महोत्सव’ 

काठमाडौँ, पुस ११ । चितवनको मुख्य व्यापारिक केन्द्र मुग्लिनमा आजदेखि ‘दोस्रो इच्छाकामना सुन्तला महोत्सव तथा फुड फेस्टिबल’ सुरु हुँदैछ । स्थानीय इच्छाकामना गाउँपालिकाको प्रसिद्ध सुन्तला खेतीको बजारीकरण र आन्तरिक पर्यटन प्रवर्धन गर्ने उद्देश्यका साथ मुग्लिन बजारमा यो महोत्सव आयोजना गरिएको हो।

चितवन उद्योग सङ्घ इच्छाकामना समिति र होटल व्यवसायी सङ्घ इच्छाकामना एकाइको संयुक्त आयोजनामा हुने यस महोत्सवमा ५० भन्दा बढी प्रदर्शनी कक्ष (स्टल) रहनेछन्। महोत्सव आगामी पुस १५ गतेसम्म चल्नेछ।

इच्छाकामनामा सुन्तलाबाट वार्षिक १० करोडको कारोबार, महोत्सवमा सुन्तला खाने प्रतियोगितादेखि विज्ञसँगको अन्तर्क्रियासम्म

इच्छाकामना गाउँपालिकाका अध्यक्ष दानबहादुर गुरुङका अनुसार यस क्षेत्रमा सुन्तला खेतीबाट मात्रै वार्षिक ९ देखि १० करोड रुपैयाँ बराबरको आर्थिक कारोबार हुने गरेको छ। “यहाँको सुन्तला अत्यन्तै स्वादिलो भएकाले बजारको कुनै समस्या छैन,” अध्यक्ष गुरुङले भन्नुभयो, “महोत्सवले यहाँको पर्यटकीय क्षेत्र र कृषि उत्पादनलाई थप चिनाउन मद्दत गर्नेछ।”

गाउँपालिकाले सुन्तला खेतीको विस्तारका लागि प्रत्येक वर्ष किसानहरूलाई सुन्तलाका बिरुवा वितरण गर्दै आएको छ। यस महोत्सवबाट इच्छाकामनाका करिब १०० सुन्तला उत्पादक किसानहरूले प्रत्यक्ष लाभ लिने अपेक्षा गरिएको छ।

महोत्सवलाई मनोरञ्जनात्मक र सूचनामूलक बनाउन दर्शकहरूका लागि विशेष आकर्षणको रूपमा सुन्तला खाने प्रतिस्पर्धा हुनेछ । सुन्तलाखेती गर्ने किसानहरूका समस्या समाधान गर्न र आधुनिक प्रविधिबारे जानकारी दिन विज्ञ र जनप्रतिनिधिहरूबीच अन्तर्क्रिया कार्यक्रम सञ्चालन गरिनेछ । स्थानीय कला, संस्कृति र परम्पराको संरक्षणका लागि सांस्कृतिक झाँकीहरू प्रदर्शन गरिनेछ । स्थानीय खानपान र होटल व्यवसायीको सक्रियतामा विभिन्न परिकारहरूको स्वाद लिन पाइनेछ ।

चितवन उद्योग सङ्घ इच्छाकामना समितिका अध्यक्ष रामहरि कँडेलले मुग्लिन बजार क्षेत्रमा आयोजना गरिएको यो महोत्सवले स्थानीय अर्थतन्त्रलाई चलायमान बनाउन र बाह्य पर्यटकलाई आकर्षित गर्न महत्वपूर्ण भूमिका खेल्ने विश्वास व्यक्त गर्नुभयो। महोत्सवको संरक्षकमा इच्छाकामना गाउँपालिका रहेको छ ।