निर्वाचन आयोगको ‘कल सेन्टर’ सञ्चालनमा, ११०२ मा सित्तैमा फोन गर्न सकिने
काठमाडौँ, ७ माघ । आगामी फागुन २१ गते हुने प्रतिनिधिसभा सदस्य निर्वाचनलाई लक्षित गरी निर्वाचन आयोगले ‘कल सेन्टर’ सञ्चालनमा ल्याएको छ ।
निर्वाचनका क्रममा मतदाता, उम्मेदवार र सर्वसाधारणमा उत्पन्न हुन सक्ने द्विविधा र जिज्ञासा समाधान गर्ने उद्देश्यले आयोगले कान्तिपथस्थित कार्यालयमा बुधबारदेखि कल सेन्टर स्थापना गरेको हो ।
आयोगका प्रवक्ता नारायणप्रसाद भट्टराईका अनुसार निर्वाचनसँग सम्बन्धित कुनै पनि जानकारी वा गुनासो भएमा नागरिकले सिधै कल सेन्टरमा सम्पर्क गर्न सक्नेछन् ।
निःशुल्क नम्बर (Toll-Free): ११०२ मा बिना पैसा फोन गर्न सकिने ।
सञ्चालन समय: बिहान ९ः०० बजेदेखि साँझ ६ः०० बजेसम्म ।
क्षमता: ६ वटा छुट्टाछुट्टै डेस्कको व्यवस्था गरिएको, जहाँ एकै पटक १५ जनासम्मले फोन गर्दा ‘होल्ड’मा बस्नु नपर्ने प्रविधि जडान गरिएको छ ।
आयोगले मतदाता नामावली, मतदान केन्द्र, निर्वाचन आचारसंहिता, उम्मेदवारी दर्ता लगायतका विषयमा नागरिकलाई सही र आधिकारिक सूचना प्रदान गर्न यो सेवा सुरु गरेको हो ।
