कपिलवस्तुमा सशस्त्र प्रहरीको गाडीको ठक्करबाट तीन वर्षीय बालकको मृत्यु, टेम्पो चालक गम्भीर घाइते
कपिलवस्तु, १४ जेठ । कपिलवस्तु नगरपालिका–३ स्थित महिता चोकमा सशस्त्र प्रहरी बलको गाडीले टेम्पोलाई ठक्कर दिँदा एक जना तीन वर्षीय बालकको मृत्यु भएको छ। दुर्घटनामा टेम्पो चालक गम्भीर घाइते भएका छन् भने अन्य आठ जना सामान्य घाइते भएका छन्।
प्रहरीका अनुसार सेमरीबाट तौलिहवातर्फ जाँदै गरेको लु प्र ०१००१ ह ३६७२ नम्बरको टेम्पोलाई बुधबार बिहान करिब ११ बजे सशस्त्र प्रहरीको गाडीले ठक्कर दिएको थियो। दुर्घटनामा कपिलवस्तु नगरपालिका–६ सेमरीका अतिकूर रहमानका तीन वर्षीय छोरा महफुज मुसलमान गम्भीर घाइते भएका थिए। उनलाई तत्काल उपचारका लागि बुटवलस्थित चौराहा अस्पताल पुर्याइएकोमा उपचारकै क्रममा निधन भएको प्रहरीले जनाएको छ।
दुर्घटनामा टेम्पो चालक कपिलवस्तु नगरपालिका–३ बरगदवाका ६० वर्षीय शिवप्रसाद चौधरी गम्भीर घाइते हुनुभएको छ। उहाँको अहिले भैरहवास्थित मेडिकल कलेजमा उपचार भइरहेको छ। दुर्घटनामा सामान्य घाइते भएका अन्य आठ जना भने प्राथमिक उपचारपछि घर फर्किएका छन्।
यसैबीच, दुर्घटना गराउने सशस्त्र प्रहरीको गाडी र त्यसका चालकलाई प्रहरीले हालसम्म नियन्त्रणमा नलिएको भन्दै पीडित परिवारले गुनासो गरेका छन्। मृतक बालकको शवलाई अहिले परीक्षण (पोष्टमार्टम) का लागि कपिलवस्तु अस्पतालमा राखिएको छ।
