३ बडी प्रब्लम’ का निर्माताको हत्या गर्ने चिनियाँ वकिललाई मृत्युदण्ड

हङकङ/बेइजिङ (एजेन्सी), १७ जेष्ठ ।  नेटफ्लिक्सको चर्चित साइन्स-फिक्सन सिरिज ‘३ बडी प्रब्लम’ (3 Body Problem) का कार्यकारी निर्माता तथा चिनियाँ अर्बपति लिन की  को बिष दिएर हत्या गर्ने वकिललाई मृत्युदण्ड दिइएको छ। चिनियाँ राज्य नियन्त्रित सञ्चार माध्यमका अनुसार सांघाईको एक अदालतले गत बिहीबार सु याओ  लाई मृत्युदण्ड दिएको हो।

‘प्रोबायोटिक’ का नाममा बिष प्रयोग
सन् २०२० मा पेशाले वकिल रहेका सु याओले आफ्ना हाकिम तथा गेमिङ टाइकुन लिन कीलाई ‘प्रोबायोटिक’ चक्की भन्दै घातक बिष खुवाएका थिए। ती चक्कीहरूमा डार्क वेबबाट किनिएका र सुले आफ्नै प्रयोगशालामा मिश्रण गरेका घातक रसायनहरू रहेको अनुसन्धानबाट खुलेको छ। बिष सेवन गरेको १० दिनपछि ३९ वर्षीय लिनको क्रिसमसका दिन अस्पतालमा मृत्यु भएको थियो।

उनको शरीरमा पारो र टिट्रोडोटोक्सिन  सहित पाँच प्रकारका घातक बिषहरू फेला परेका थिए।

‘ब्रेकिङ ब्याड’ बाट प्रेरित हत्याको योजना
यो हत्या प्रकरण कुनै फिल्मको कथाभन्दा कम छैन। अनुसन्धानका अनुसार सु याओ चर्चित अमेरिकी सिरिज ‘ब्रेकिङ ब्याड’ बाट प्रभावित भएका थिए। उनले सांघाईको एउटा उपनगरमा गोप्य प्रयोगशाला नै स्थापना गरेर बिष बनाउने अभ्यास गरेका थिए। उनले तयार पारेको बिष सुरुमा कुकुर, बिरालो जस्ता जनावरहरूमा परीक्षण गर्ने गरेको खुलेको छ।

कम्पनीको व्यवस्थापन र कार्यशैलीलाई लिएर लिनसँग भएको विवाद नै हत्याको मुख्य कारण रहेको अदालतको ठहर छ। सुले लिनलाई मात्र नभई अन्य दुई कार्यकारी अधिकारीहरूलाई समेत कफी र रक्सीमा बिष मिसाएर खुवाएका थिए, तर उनीहरू भने बाँच्न सफल भए।

नेटफ्लिक्ससँगको सम्झौता र लिनको सपना
लिन की ‘युजु गेम्स’ का संस्थापक थिए र उनी चिनियाँ लेखक लिउ सिजिनको प्रख्यात उपन्यास ‘थ्री-बडी प्रब्लम’ का ठुलो प्रशंसक थिए। उनले नै यस उपन्यासलाई अन्तर्राष्ट्रिय स्तरमा फिल्म वा सिरिजका रूपमा ल्याउने सपना देखेका थिए।

सन् २०२० मा नेटफ्लिक्सले यसमा आधारित सिरिज बनाउने घोषणा गरेको केही महिनापछि नै लिनको हत्या भएको थियो। सन् २०२४ मा रिलिज भएको यस सिरिजको सुरुवाती क्रेडिटमा अहिले पनि लिन कीलाई ‘कार्यकारी निर्माता’ को रूपमा सम्मान दिइएको छ।

कम्पनीको प्रतिक्रिया
लिनको कम्पनी ‘थ्री बडी युनिभर्स’ ले एक विज्ञप्ति जारी गर्दै अदालतको फैसलाको स्वागत गरेको छ। कम्पनीले भनेको छ, “हाम्रा सबै कर्मचारीहरू कानुनी प्रणालीले दिएको न्यायप्रति कृतज्ञ छन्। यो लिन कीप्रतिको सच्चा श्रद्धाञ्जली हो।”

सु याओलाई सन् २०२२ मा सांघाईको अदालतले ज्यान मुद्दामा दोषी ठहर गर्दै मृत्युदण्डको सजाय सुनाएको थियो। त्यसको दुई वर्षपछि गत बिहीबार उनलाई मृत्युदण्ड दिइएको हो।