सुदूरपश्चिमका मुख्यमन्त्री भट्टले आज विश्वासको मत लिँदै, यस्तो छ अंकगणित

धनगढी, ३ भदौ । सुदूरपश्चिम प्रदेशका मुख्यमन्त्री खगराज भट्टले आज प्रदेशसभाबाट विश्वासको मत लिँदै हुनुहुन्छ। गत साउन २९ गते मुख्यमन्त्रीमा नियुक्त हुनुभएका भट्टले संवैधानिक व्यवस्थाअनुसार नियुक्तिको ३० दिनभित्र विश्वासको मत लिन लाग्नुभएको हो।

प्रदेशसभा सचिवालयका सचिव देवबहादुर बोगटीका अनुसार मुख्यमन्त्री भट्टले मङ्गलबार नै सचिवालयलाई पत्र पठाएर विश्वासको मत लिने प्रयोजनका लागि बैठकको व्यवस्थापन गर्न आग्रह गर्नुभएको थियो। सोहीअनुसार आज दिउँसो १:०० बजे प्रदेशसभाको बैठक बोलाइएको छ।

संविधानको धारा १६८ को उपधारा (२) बमोजिम दुई वा दुईभन्दा बढी दलको समर्थनमा मुख्यमन्त्री नियुक्त भएकाले भट्टले सदनको विश्वास लिनुपर्ने बाध्यकारी व्यवस्था छ। मुख्यमन्त्री भट्टले आजको बैठकमा विश्वासको मतसम्बन्धी प्रस्ताव पेस गरेपछि त्यसमाथि छलफल हुने र त्यसलगत्तै मतदान प्रक्रिया अघि बढ्नेछ।

५२ सदस्यीय सुदूरपश्चिम प्रदेशसभामा बहुमतका लागि २७ सांसदको समर्थन आवश्यक पर्दछ। हाल मुख्यमन्त्रीको पक्षमा सहज बहुमत देखिएको छ:
नेपाली कम्युनिस्ट पार्टी (मुख्यमन्त्रीको दल): २२ सिट
नेकपा (एमाले): ११ सिट (सरकारको मुख्य साझेदार)
जम्मा समर्थन: ३३ सिट (बहुमतका लागि चाहिने भन्दा ६ सिट बढी)
विपक्षी बेन्चमा रहेको नेपाली कांग्रेसको १८ र राष्ट्रिय प्रजातन्त्र पार्टी (राप्रपा) को १ सिट रहेको छ।

विश्वासको मत प्राप्त गरेलगत्तै मुख्यमन्त्री भट्टले मन्त्रिपरिषद्लाई पूर्णता दिने तयारी गर्नुभएको छ। १० सदस्यीय मन्त्रिमण्डल रहने सुदूरपश्चिममा हाल मुख्यमन्त्रीसहित केवल ३ मन्त्री र १ राज्यमन्त्री मात्रै जिम्मेवारीमा हुनुहुन्छ। अहिले मुख्यमन्त्री भट्ट आफैँले आन्तरिक मामिला तथा कानुन, उद्योग, पर्यटन, वन तथा वातावरण र भौतिक पूर्वाधार विकास जस्ता महत्वपूर्ण मन्त्रालयहरूको कार्यभार सम्हालिरहनुभएको छ।