भोटेकोशी बाढीपछिको पुनर्निर्माण र अनुगमनका लागि सर्वदलीय संयन्त्र बनाउने तयारी, सिंहदरबारमा बैठक जारी
काठमाडौँ, १६ भदौ । रसुवाको भोटेकोशीमा आएको विनाशकारी बाढीबाट भएको क्षति, बेपत्ताहरूको खोजी, उद्धार तथा राहत र पुनःस्थापनाका विषयमा छलफल गर्न सिंहदरबारमा सर्वदलीय बैठक सुरु भएको छ। राष्ट्रिय स्वतन्त्र पार्टीको संसदीय दलको कार्यालयमा सुरु भएको उक्त बैठकमा विभिन्न राजनीतिक दलका दोस्रो तहका नेताहरूको सहभागिता रहेको छ।
बैठकमा जलवायु अनुकूलन, राष्ट्रिय विपद् नीतिमा समयानुकूल सुधार तथा सरकारलाई प्रभावकारी सल्लाह र सहयोग पुर्याउने विषयमा घनीभूत छलफल भइरहेको छ।
यसअघि भदौ १० गतेको बाढी र पहिरोलगतै बसेको सर्वदलीय बैठकले विपद्को दिगो समाधान र पूर्वतयारीका सम्बन्धमा १० बुँदे साझा सङ्कल्प पारित गरेको थियो। उक्त सङ्कल्पको बुँदा नम्बर १० मा विपद् व्यवस्थापन र पुनर्निर्माणका कार्यलाई केवल अल्पकालीन राहतमा मात्र सीमित नराखी दीर्घकालीन समाधान खोज्ने उल्लेख छ।
सोही सङ्कल्पको जगमा टेकेर आजको बैठकले सरकारको काममा सघाउन र जोखिम न्यूनीकरणका कार्यलाई थप वैज्ञानिक बनाउन संसदीय समितिको स्वरूपमा सर्वदलीय संयन्त्रलाई अन्तिम रूप दिने अपेक्षा गरिएको छ।
विपद्को यस चुनौतीपूर्ण घडीमा सबै राजनीतिक दलहरू एकै ठाउँमा उभिएर राष्ट्रिय सङ्कटको समाधान खोज्न सक्रिय देखिएका छन्। बैठकमा सहभागी नेताहरूले बाढी प्रभावित क्षेत्रमा भइरहेको उद्धारको समीक्षा गर्दै पुनःस्थापनाको ठोस योजना ल्याउनुपर्नेमा जोड दिएका छन्।
