भोटेकोशी बाढी प्रभावित क्षेत्रमा थप विशेषज्ञ चिकित्सक टोली खटिँदै

काठमाडौं, २६ भदौ । भोटेकोशी बाढी प्रभावित क्षेत्रमा थप विशेषज्ञ चिकित्सकको टोली खटाइएको छ। स्वास्थ्य तथा खाद्य स्वच्छता मन्त्रालयले परोपकार प्रसूति तथा स्त्रीरोग अस्पताल र कान्ति बाल अस्पतालका विशेषज्ञ चिकित्सकसहितको टोली आज नुवाकोट पठाउने भएको हो।

भोटेकोशी बाढीबाट प्रभावित क्षेत्रमा मातृ तथा बाल स्वास्थ्य सेवालाई थप प्रभावकारी बनाउनकै लागि यो थप टोली परिचालन गरिएको हो। प्रभावित क्षेत्रमा स्वास्थ्य टोली पहिल्यै परिचालित भई सेवा दिइरहेको भए पनि मातृ तथा नवजात शिशु, बालबालिका तथा प्रजनन स्वास्थ्यसम्बन्धी विशेषज्ञ सेवाको थप आवश्यकता देखिएको मन्त्रालयले जनाएको छ।

टोलीमा कान्ति बाल अस्पतालकी बालरोग विशेषज्ञ डा. बिना प्रजापति, परोपकार प्रसूति तथा स्त्रीरोग अस्पतालका वरिष्ठ स्त्री तथा प्रसूति रोग विशेषज्ञ डा. हरिकुमार श्रेष्ठ र डा. श्रीराम खड्का रहेका छन्।

यो टोलीले नुवाकोट र रसुवाका बाढी प्रभावित क्षेत्रमा पुगेर आवश्यकताअनुसार मातृ तथा नवजात शिशु, बालबालिका र प्रजनन स्वास्थ्यसम्बन्धी विशेषज्ञ सेवा प्रदान गर्नेछ। टोलीसँगै आवश्यक औषधि तथा स्वास्थ्य सामग्री समेत पठाइने मन्त्रालयले जनाएको छ।