भोटेकोशी बाढी: क्षतिको विवरण सङ्कलन गर्न रसुवामा २५ सदस्यीय समिति गठन

रसुवा, ३१ भदौ । भोटेकोशी बाढीबाट भएको धनजनको क्षतिको विवरण सङ्कलन गर्न रसुवा जिल्लामा २५ सदस्यीय तथ्याङ्क मूल्याङ्कन समिति गठन भएको छ।

जिल्ला समन्वय अधिकारी राजेन्द्रप्रसाद आचार्यको संयोजकत्वमा समिति गठन गरिएको हो। जिल्ला विपद् व्यवस्थापन समितिका संयोजक एवं प्रमुख जिल्ला अधिकारी कमलप्रसाद पाण्डेको अध्यक्षतामा मङ्गलबार सम्पन्न विपद् व्यवस्थापन समितिको बैठकले बाढीबाट भएको धनजनको प्रारम्भिक क्षतिको विवरण एक महिनाभित्र सङ्कलन गर्न नवगठित मूल्याङ्कन समितिलाई कार्यादेश दिएको आचार्यले जानकारी दिए।

समितिमा गल्छी–त्रिशूली–मैलुङ–स्याफ्रुबेँसी–रसुवागढी सडक सुधार आयोजना, सहरी विकास तथा भवन निर्माण आयोजना, रसुवा भन्सार कार्यालय, सुरक्षा निकाय, नापी, भूमि प्रशासन, जलविद्युत् आयोजना, नेपाल इन्टरमोडललगायत २५ सरकारी तथा गैरसरकारी संस्था/निकायका प्रमुख प्रतिनिधि सदस्य रहेका छन्। सहायक प्रमुख जिल्ला अधिकारी द्रुवप्रसाद अधिकारी समितिको सदस्यसचिव रहनुभएको छ।

गाउँपालिका भवन पुनर्निर्माणका लागि निर्णय
बाढीका कारण स्याफ्रुबेँसीमा रहेको गोसाइँकुण्ड गाउँपालिकाको भवन बगेपछि गाउँपालिकाको नियमित कार्यसञ्चालनका लागि रसुवा भूसंरक्षण कार्यालयको खाली भवन प्रयोग गर्ने निर्णय पनि भएको छ। त्यस्तै, बेत्रावतीको खाल्टेमा बाढीले बगाएको उत्तरगया गाउँपालिकाको भवन पुनर्निर्माणका लागि बेत्रावतीमाथि रहेको सामुदायिक वन क्षेत्रभित्र भवन निर्माण गर्ने प्रक्रिया अघि बढाउने निर्णय भएको जिल्ला प्रशासन कार्यालयले जनाएको छ।

बाढी प्रभावित क्षेत्रमा उद्धार तथा अन्य विपद्सम्बन्धी कार्यका लागि निजी कम्पनीका हेलिकप्टर प्रयोग गर्नुपर्ने भएमा सम्बन्धित सङ्घसंस्था वा व्यक्तिले माग गरेअनुसार रसुवा उडानको अनुमति लिन लिखित अनुरोध प्राप्त भए जिल्ला प्रशासन कार्यालयले आवश्यक सहजीकरण गर्ने निर्णय पनि बैठकले गरेको छ।

बाढीले रसुवाका विभिन्न स्थानमा मानवीय तथा भौतिक क्षति पुर्‍याएको थियो। क्षतिको एकिन विवरण सङ्कलन गरी राहत, पुनःस्थापना तथा पुनर्निर्माणका लागि आवश्यक प्रक्रिया अघि बढाउन तथ्याङ्क सङ्कलन समितिले काम गर्ने जनाइएको छ।

यसैगरी बाढीले बगाएका रसुवा–नुवाकोट सीमाना बेत्रावतीको फलाखुखोला, स्याफ्रुबेँसीको भोटेकोसी तथा रोङ्गा खोलामा बेलीब्रिज यथाशीघ्र जडान गरी सडक तथा पैदलमार्गको सञ्जाल जोड्न रसुवा नागरिक समाजले अनुरोध गरेको छ।