एजेन्सी, ४ असाेज । तेहरानले मध्यस्थकर्तामार्फत वासिङ्टनलाई रणनीतिक हर्मुज जलसन्धि पुनः खोल्नका लागि आफ्ना सर्तहरू पठाएको इरानका मुख्य वार्ताकारले आइतबार जानकारी गराएका छन्। इरानले मध्यपूर्व युद्धभरि नै यो जलमार्गमा नियन्त्रण कायम गरेको छ।

फेब्रुअरीको अन्त्यतिर अमेरिका–इजरायली हमलाबाट सुरु भएको मध्यपूर्व द्वन्द्वमा अमेरिका र इरान महिनौँदेखि गतिरोधमा फसेका छन्। तेहरानले त्यसयता विश्वको तेल र ग्यासका लागि महत्वपूर्ण यातायात मार्ग हर्मुज जलमार्गमाथि कडा नियन्त्रण कायम राखेको छ भने वासिङ्टनले इरानी बन्दरगाह र अर्थतन्त्रलाई प्रभावित पार्ने अभियान चलाएको छ।

युद्ध अन्त्यका लागि भएका वार्तामा मुख्य वार्ताकारका रूपमा रहेका इरानी संसद्का सभामुख मोहम्मद बाघेर गालिबाफले “हाम्रा सन्देश र सर्तहरूको व्याख्या मध्यस्थकर्तामार्फत अर्को पक्षलाई स्पष्ट रूपमा पुर्‍याइएको छ” भनेका छन्। उनले इरानी राष्ट्रिय टेलिभिजनलाई दिएको अन्तर्वार्तामा “जबसम्म सर्तहरू पूरा हुँदैनन् र अमेरिकी प्रतिबद्धताहरू पालना हुँदैनन्, तबसम्म वार्ताअघिको अवस्थामा फर्कन र जलमार्ग खुला गर्ने कुरा सम्भव हुनेछैन” भनेका छन्।

इरानको सर्वोच्च राष्ट्रिय सुरक्षा परिषद्का प्रमुख मोहसेन रेजाइले शनिबार अल–जजिरासँगको अन्तर्वार्तामा इस्लामिक गणतन्त्र (इरान)ले मध्यस्थकर्ता कतारमार्फत अमेरिकासामु आफ्ना सर्तहरू पठाएको बताउँदै हाम्रा सर्तहरूमा सबै मोर्चामा युद्ध अन्त्य, रोकिएका कोषहरूको रिहाई र नौसेना नाकाबन्दी अन्त्य रहेको उल्लेख गरे।

इरानी अधिकारीहरूका अनुसार मध्यस्थकर्ता पाकिस्तानका गृहमन्त्री मोहसिन नक्वी आइतबार वार्ताका लागि तेहरान आउने कार्यक्रम रहेको छ।

यसैबीच इरानको खातम अल–अनबिया केन्द्रीय सैन्य कमान्डले टेलिभिजनमा प्रसारित वक्तव्यमार्फत आइतबार संयुक्त राज्य अमेरिकाविरुद्ध चेतावनी जारी गर्दै अमेरिकाले इस्लामिक इरानसँग व्यवहार गर्दा गल्ती गरेमा त्यस देशका मध्यपूर्व क्षेत्रका सबै आधार र हितहरू निरन्तर हमलाको निशाना बन्ने बताएको छ।