काठमाडौँ, १४ असोज । जापानमा जारी २०औँ एसियाली खेलकुद प्रतियोगिताअन्तर्गत जुडोमा नेपालका चारै खेलाडी पहिलो चरणमै पराजित भएका छन् ।

जापानको ऐचि इन्टरनेसनल एरिनामा बुधबार भएको जुडो प्रतियोगितामा नेपालबाट महिला र पुरुषतर्फ गरी चार खेलाडीले विभिन्न तौल समूहमा प्रतिस्पर्धा गरेका थिए । तर, चारै खेलाडीले आ–आफ्नो पहिलो खेलमा पराजय व्यहोरेपछि प्रतियोगिताको आगामी चरणमा प्रवेश गर्न सकेनन् ।

महिला ५२ केजी तौल समूहमा नेपालकी देवकीमाया श्रेष्ठले पहिलो चरणमा भियतनामकी थि नगान हासँग प्रतिस्पर्धा गरेकी थिइन् । उक्त खेलमा देवकीमाया पराजित भएसँगै उनको प्रतियोगिता यात्रा पहिलो चरणमै टुंगियो ।

यस्तै, महिला ४८ केजी तौल समूहमा नेपालकी निशा श्रेष्ठले हङ्कङकी वङ का लीसँग प्रतिस्पर्धा गरेकी थिइन् । निशाले पनि प्रतिस्पर्धात्मक खेलमा पराजय व्यहोरेपछि उनी पहिलो चरणबाटै बाहिरिइन् ।

पुरुषतर्फ ६६ केजी तौल समूहमा नेपालका विशेष विकले हङ्कङका वङ का कीको सामना गरेका थिए । उक्त खेलमा विशेष पराजित भएपछि उनी पनि दोस्रो चरणमा पुग्न असफल भए ।

त्यस्तै, पुरुष ६० केजी तौल समूहमा नेपालका विकास विकले उज्बेकिस्तानका सामरिद्दिन कुचकारोभसँग प्रतिस्पर्धा गरेका थिए । विकासले पनि पहिलो खेलमा पराजय व्यहोरेपछि उनको एसियाली खेलकुद यात्रा पहिलो चरणमै समाप्त भयो ।

यससँगै जुडोमा नेपालबाट सहभागी देवकीमाया श्रेष्ठ, निशा श्रेष्ठ, विशेष विक र विकास विक चारै खेलाडी प्रतियोगिताको पहिलो चरणबाटै बाहिरिएका छन् ।