चितवन, १५ असोज। कृषि तथा वन विज्ञान विश्वविद्यालय, रामपुरका शिक्षक तथा कर्मचारीले लिएको अध्ययन बिदा दुरुपयोग भएको गुनासोपछि विश्वविद्यालयले छानबिन समिति गठन गरेको छ ।

विश्वविद्यालयको वनविज्ञान सङ्कायका डीन डा गान्धिव काफ्लेको संयोजकत्वमा समिति गठन गरिएको हो । विश्वविद्यालयका रजिस्ट्रार प्रा डा सुवीर सिंहले जारी गरेको पत्रअनुसार शिक्षा तथा खेलकुद मन्त्रालय र विश्वविद्यालय अनुदान आयोगबाट प्राप्त निर्देशन तथा विश्वविद्यालयको कार्यकारी परिषद्को निर्णयका आधारमा समिति गठन गरिएको हो ।

समितिमा कृषि सङ्कायका सहायक डीन (प्रशासन) डा कृष्णप्रसाद थापालिया, पशु विज्ञान, पशु चिकित्सा तथा मत्स्य विज्ञान सङ्कायका सहायक डीन (प्रशासन) राजेन्द्र बस्याल र सहप्रशासक सहदेव चौधरी सदस्य तथा कर्मचारी प्रशासन महाशाखाका कामु उपप्रशासक दिनेश अधिकारी सदस्य सचिव रहनुभएको छ ।

समितिले विश्वविद्यालय स्थापना भएदेखि हालसम्म तथा अन्य विश्वविद्यालय वा निकायबाट समायोजन भई विश्वविद्यालयको शिक्षक तथा कर्मचारी सेवामा रहेका र अध्ययन बिदा लिएका शिक्षक तथा कर्मचारीको बिदा स्वीकृति प्रक्रिया, अध्ययनको अवस्था, बिदाको प्रयोजन तथा बिदा अवधिमा भए÷गरेका गतिविधिबारे छानबिन गर्नेछ ।

अध्ययन बिदाको स्वीकृति प्रक्रिया, अध्ययनको प्रगति र बिदाको अवधिमा सम्बन्धित शिक्षक तथा कर्मचारीले गरेका गतिविधिलाई समेत छानबिनको आधार बनाइने विश्वविद्यालयले जनाएको छ ।

समितिले तोकिएको कार्यादेशअनुसार अध्ययन बिदा दुरुपयोगसम्बन्धी विषयमा छानबिन गरी तीन महिनाभित्र विश्वविद्यालयको रजिस्ट्रार कार्यालयमा विस्तृत प्रतिवेदन बुझाउनेछ ।

विसं २०६९ मा स्थापना भएको विश्वविद्यालयमा प्राध्यापक तथा कर्मचारी गरी ७७१ जना कार्यरत छन् । तीमध्ये १७२ जना प्राध्यापनतर्फ र ५९९ जना कर्मचारी छन् । हाल प्राध्यापनतर्फ ४० जना र कर्मचारीतर्फ २५ जना अध्ययन बिदामा रहेको रजिस्ट्रार सिंहले जानकारी दिनुभयो ।

उहाँका अनुसार हाल अध्ययन बिदामा रहेका तथा यसअघि बिदा लिएका शिक्षक तथा कर्मचारीले बिदाको उद्देश्यअनुसार अध्ययन गरे÷नगरेको विषयमा समेत समितिले अध्ययन गर्नेछ । यसअघि अध्ययन बिदामा गएर विश्वविद्यालयमा नफर्किएका शिक्षक तथा कर्मचारी भए त्यसको समेत खोजी गरिने उहाँले बताउनुभयो ।