काठमाडौँ । नेपाल प्रिमियर लिग (एनपीएल) को तेस्रो संस्करणलाई व्यवस्थित र थप आकर्षक बनाउन नेपाल क्रिकेट संघ (क्यान) ले तयारीलाई तीव्रता दिएको छ। प्रतियोगिता सुरु हुन करिब २०–२१ दिन बाँकी रहँदा क्यानले दर्शकको क्षमता वृद्धि, मिडिया बक्सको सुधार, विशिष्ट पाहुनाको व्यवस्थापन तथा शौचालयलगायतका पूर्वाधारमा सुधार गर्ने तयारी गरेको हो।

क्यानका सचिव पारस खड्काले प्रतियोगिताको तयारी अन्तिम चरणमा पुगेको जानकारी दिँदै यसपटक विगतका दुई संस्करणभन्दा अझ राम्रो व्यवस्थापन र दर्शक अनुभव प्रदान गर्ने लक्ष्य रहेको बताए।

उनका अनुसार प्रतियोगिता ठूलो हुँदै जाँदा क्यानको जिम्मेवारीसमेत बढ्दै गएको छ। दर्शक, खेलाडी, सञ्चारकर्मी तथा प्रतियोगितासँग जोडिएका सबै पक्षलाई सहज हुने गरी व्यवस्थापन सुधारमा जोड दिइएको उनले बताए।

‘प्रतियोगितालाई राम्रोसँग सम्पन्न गर्नुपर्ने अपेक्षा धेरै छन्। एनपीएल जति ठूलो हुँदै गएको छ, हाम्रो जिम्मेवारी पनि त्यति नै बढेको छ,’ खड्काले भने, ‘यसपटक विगतभन्दा अझ राम्रो संरचना र व्यवस्थापनमा प्रतियोगिता सञ्चालन गर्ने हाम्रो प्रयास छ।’

क्यानले यसपटक मिडिया बक्सलाई व्यवस्थित बनाउने, विशिष्ट तथा अति विशिष्ट पाहुनाको आवागमन र व्यवस्थापनलाई सहज बनाउने तथा दर्शकको क्षमता बढाउन सकिने स्थानहरूको पहिचान गरी आवश्यक सुधार गर्ने योजना बनाएको छ।

गत संस्करणमा विशेषगरी एनपीएलका खेल हेर्न आउने दर्शकको चाप बढ्दा मैदानको दर्शक क्षमता अपुग भएको अनुभवका आधारमा यसपटक उपलब्ध स्थानको अधिकतम उपयोग गर्ने प्रयास भइरहेको खड्काले बताए। मैदान प्रवेश गर्ने गेटदेखि भित्रसम्मको आवागमनलाई सहज बनाउन सम्बन्धित मन्त्रालयसँग समन्वय गरी सहयोगका लागि पहल भइरहेको पनि उनले जानकारी दिए।

त्यस्तै, टिकट काटेर मैदान प्रवेश गर्ने दर्शकले खेल हेर्ने समयदेखि घर फर्किंदासम्म सहज अनुभव गर्न सकून् भन्ने उद्देश्यले शौचालयलगायतका सुविधामा पनि सुधार गरिने उनले बताए।

‘दर्शकले गत वर्षजस्तै यसपटक पनि रमाइलो अनुभव गरेर फर्कन सकून् भन्ने हाम्रो चाहना हो। त्यसैले आफ्नो क्षमताले भ्याएसम्म सबै पक्षमा सुधार गरेर प्रतियोगितालाई अझ व्यवस्थित बनाउने प्रयास गरिरहेका छौँ,’ खड्काले भने।

दशैँ र तिहारको बीचमा प्रतियोगिता आयोजना गर्नुको कारणबारे स्पष्ट पार्दै खड्काले अन्तर्राष्ट्रिय क्रिकेटको तालिका, अन्य क्रिकेट लिगसँगको प्रतिस्पर्धा तथा विदेशी खेलाडीको उपलब्धतालगायतका विषयलाई ध्यानमा राखेर यस वर्षका लागि उपयुक्त समय छनोट गरिएको बताए।

नेपाली क्रिकेटप्रति दर्शकको आकर्षण र समर्थन बढ्दै गएको उल्लेख गर्दै उनले एनपीएलको तेस्रो संस्करणमा पनि विगतका दुई संस्करणमा जस्तै उत्साहजनक सहभागिता रहने विश्वास व्यक्त गरे।

क्यानले दशैँअघि नै आवश्यक तयारीका काम सम्पन्न गरी प्रतियोगितालाई पूर्ण रूपमा सञ्चालन गर्न सक्ने अवस्थामा पुग्ने लक्ष्य राखेको छ। दर्शकको बढ्दो चासोलाई ध्यानमा राख्दै पूर्वाधार र व्यवस्थापनमा गरिने सुधारले नेपाली क्रिकेटको व्यावसायिक विकासमा थप योगदान पुग्ने अपेक्षा गरिएको छ।