तेहरान / लन्डन । इरानको इस्लामिक रिभोलुसनरी गार्ड्स कोर्प्स  को नौसेनाले होर्मुज जलमार्गमा ‘अनधिकृत’ मार्गबाट पार गर्ने क्रममा दुई मिलियन (२० लाख) भन्दा बढी ब्यारेल कच्चा तेल बोकेको एउटा सुपरटेन्कर समुद्री बारूद (sea mine) मा ठोक्किएको जनाएको छ। अर्धसरकारी तासनिम  समाचार एजेन्सीका अनुसार उक्त ठक्करबाट जहाजमा ठूलो विष्फोट हुनुका साथै भीषण आगलागी भएको छ।

आइआरजीसी  ले जारी गरेको विज्ञप्तिमा उक्त ट्यान्करले अमेरिकी सैन्य सहयोगमा र छलकपटपूर्ण तरिकाले आफ्ना सबै ट्र्याकिङ तथा राडार प्रणालीहरू बन्द गरेर जलमार्ग पार गर्ने प्रयास गरिरहेको आरोप लगाइएको छ। “होर्मुज जलमार्ग बन्द छ,” चेतावनी दिँदै आइआरजीसी नौसेनाले इरानी नियम उल्लङ्घन गर्ने र अमेरिकी समर्थनमा निर्भर रहने जहाजहरूले गम्भीर परिणाम भोग्नुपर्ने जनाएको छ।

युकेएमटीओ  द्वारा समुद्री आक्रमणको चेतावनी

यसैबीच, युनाइटेड किङडम मरिचाइम ट्रेड अपरेसनले हालैको साप्ताहिक प्रतिवेदनमा समुद्री आक्रमणका घटनाहरू अपेक्षाभन्दा कम रिपोर्ट भइरहेको चेतावनी दिएको छ। पछिल्लो साता मात्रै १२ वटा आक्रमणका घटनाहरू रिपोर्ट भएका छन्, जसमध्ये १० वटा होर्मुज जलमार्गमा, १ वटा खाडी क्षेत्रमा र १ वटा ओमानको खाडीमा भएका छन्।


यूकेएमटीओका अनुसार आक्रमणमा परेका अधिकांश जहाजहरूले एजेन्सीलाई घटनाबारे जानकारी दिन अस्वीकार गरेका कारण वास्तविक आक्रमणहरूको सही सङ्ख्या पत्ता लगाउन कठिन भइरहेको छ। प्रभावित जहाजहरूमध्ये ६ वटाले आफ्नो यात्रा निरन्तरता दिएका वा गन्तव्यमा पुगेका, १ वटा हराएको र २ वटा अक्षम बनेका छन्।

प्रतिवेदनमा युद्धपूर्वको तुलनामा होर्मुज भएर हुने कुल आगमन र प्रस्थान  करिब ७० प्रतिशतले घटेको जनाइएको छ। अमेरिकी पक्षले दाबी गरेका सुरक्षित पारसञ्चारका तथ्यांकहरूलाई समेत स्वतन्त्र रूपमा प्रमाणीकरण गर्न नसकिएको युकेएमटीओले औंल्याएको छ।