चितवन । चितवनको भरतपुर महानगरपालिका–२६, दिव्यनगरका दीपक पाख्रिन विगत चार दशकदेखि व्यावसायिक फूलखेतीमा सक्रिय हुनुहुन्छ । लामो समयदेखि फूलखेतीलाई आफ्नो मुख्य पेसा बनाउँदै आउनुभएका उहाँले यस वर्ष तिहारलाई लक्षित गरी दुई बिघा क्षेत्रफलमा सयपत्री फूलखेती गर्नुभएको छ ।

तिहार नजिकिएसँगै सयपत्री फूलको माग बढ्ने भएकाले पाख्रिनले हरेक वर्ष चाडपर्वलाई लक्षित गरी फूलखेती गर्दै आउनुभएको छ । यस वर्ष उहाँले दुई बिघा जमिनमा सयपत्री फूल लगाउनुभएको हो । गत वर्ष भने उहाँले पाँच बिघा क्षेत्रफलमा फूलखेती गर्नुभएको थियो । यस वर्ष तिहार ढिलो परेका कारण खेतीको क्षेत्रफल घटाउनुभएको उहाँ बताउनुहुन्छ ।

चार दशक लामो फूलखेतीको अनुभव सँगाल्नुभएका पाख्रिनका अनुसार फूलखेतीबाट छोटो समयमै राम्रो आम्दानी गर्न सकिन्छ । विशेषगरी तिहारजस्ता चाडपर्वमा सयपत्री फूलको माग बढी हुने भएकाले यसले किसानलाई राम्रो आम्दानीको अवसर प्रदान गर्ने उहाँको अनुभव छ ।

नेपालमा तिहारका बेला घर, मठमन्दिर तथा विभिन्न धार्मिक स्थल सजाउन सयपत्री फूलको प्रयोग व्यापक रूपमा गरिन्छ । त्यसैले यस समयमा फूलको माग बढ्ने गरेको छ । चाडपर्वको समयमा स्वदेशमै उत्पादित फूलले बजार पाउनु फूलखेतीमा संलग्न किसानका लागि उत्साहजनक पक्ष हो ।

चार दशकदेखि निरन्तर फूलखेतीमा लाग्नुभएका पाख्रिनको अनुभवले कृषि क्षेत्रमा व्यावसायिक सम्भावना खोज्नेहरूका लागि फूलखेती पनि राम्रो विकल्प हुन सक्ने देखाउँछ । परम्परागत खेतीभन्दा फरक व्यवसाय अपनाएर लामो समयदेखि यसैमा रमाइरहनुभएका उहाँले फूलखेतीमार्फत आफ्नो व्यावसायिक यात्रा अघि बढाउँदै आउनुभएको छ ।