वीरगञ्ज नाकाबाट ६ महिनामा ३२ हजार बढी ‘अनएसेम्बल्ड’ मोटरसाइकल भित्रिए

काठमाडौँ, माघ २२ । चालु आर्थिक वर्षको पहिलो ६ महिनामा वीरगञ्ज भन्सार कार्यालयमार्फत दुई पाङ्ग्रे सवारीसाधनको आयातमा उल्लेख्य वृद्धि भएको छ । गत आर्थिक वर्षको सोही अवधिको तुलनामा यस वर्ष ‘अनएसेम्बल्ड’ (एसेम्बल नगरिएका), तयारी मोटरसाइकल र विद्युतीय मोटरसाइकलको आयात बढेको हो ।

अनएसेम्बल्ड मोटरसाइकलको आयात र राजस्व
वीरगञ्ज भन्सार कार्यालयको तथ्याङ्कअनुसार चालु आर्थिक वर्षको साउनदेखि पुस मसान्तसम्ममा ४ अर्ब ५६ करोड रुपियाँ बराबरका ३२ हजार ३३१ वटा अनएसेम्बल्ड मोटरसाइकल आयात भएका छन् । यी पार्टपुर्जाहरूको आयातबाट राज्यकोषमा ४ अर्ब ४३ करोड रुपियाँ राजस्व दाखिला भएको छ । गत आर्थिक वर्षको सोही अवधिमा ३ अर्ब ३८ करोड रुपैयाँ बराबरका २५ हजार ८५७ वटा यस्ता मोटरसाइकल आयात भएका थिए ।

तयारी मोटरसाइकलको अवस्था
यसैगरी, चालु आर्थिक वर्षको पहिलो ६ महिनामा तयारी अवस्थाका मोटरसाइकलको आयात पनि बढेको छ । यस अवधिमा ४५ करोड ८१ लाख रुपियाँ बराबरका ४ हजार ५६७ वटा मोटरसाइकल भित्रिएका छन् । गत वर्षको पहिलो ६ महिनामा २० करोड ७६ लाख रुपियाँ बराबरका २ हजार १९२ वटा मात्र मोटरसाइकल आयात भएका थिए ।

विद्युतीय मोटरसाइकलमा आकर्षण
वातावरणमैत्री विद्युतीय सवारीसाधनतर्फ पनि उपभोक्ताको आकर्षण बढ्दो देखिएको छ। तथ्याङ्कअनुसार चालु आर्थिक वर्षको पहिलो ६ महिनामा ५८ करोड १८ लाख रुपियाँ बराबरका ४ हजार ५९४ वटा विद्युतीय मोटरसाइकल आयात भएका छन्। गत आर्थिक वर्षको सोही अवधिमा ३० करोड ९६ लाख रुपियाँ मूल्यका २ हजार २१८ वटा विद्युतीय मोटरसाइकल आयात भएका थिए।

समग्रमा, वीरगञ्ज नाका भएर हुने दुई पाङ्ग्रे सवारीसाधनको आयातमा आएको यो वृद्धिसँगै राजस्व संकलनमा समेत सकारात्मक प्रभाव परेको भन्सार कार्यालयले जनाएको छ ।