एमाले सचिवालय बैठक: महासचिवसहित ९ जनाले राखे धारणा, निर्णय भोलि हुने

काठमाडौँ, ९ जेठ । नेकपा (एमाले) को केन्द्रीय सचिवालय बैठक शनिबार पनि जारी रह्यो। अध्यक्ष केपी शर्मा ओलीको भक्तपुरस्थित गुण्डु निवासमा बसेको बैठकमा आज महासचिव शङ्कर पोखरेलसहित ९ जना पदाधिकारीले आफ्नो धारणा राखेका हुन्।

बैठकपछि सञ्चारकर्मीहरूसँग कुरा गर्दै उपमहासचिव लेखराज भट्टले आज महासचिव पोखरेल, तीन जना उपमहासचिव र पाँच जना सचिवले पार्टीको आन्तरिक अवस्था र कार्यविभाजनका विषयमा आफ्नो अनुभव तथा सुझाव प्रस्तुत गरेको जानकारी दिनुभयो।

नेताहरूले धारणा राखिरहँदा अध्यक्ष ओलीले बीचबीचमा आवश्यक दिशानिर्देश समेत गर्नुभएको भट्टले बताउनुभयो। हिजो (शुक्रबार) को बैठकलाई लिएर सञ्चारमाध्यममा आएका कतिपय समाचारप्रति उहाँले असन्तुष्टि व्यक्त गर्नुभयो। “हिजोको बैठकमा उठेका विषयलाई लिएर बाहिर निकै अतिरञ्जित गरियो, जुन सत्य होइन,” भट्टले भन्नुभयो।

सचिवालयका कुल १९ पदाधिकारीमध्ये अब ४ जना सचिवहरूले मात्र बोल्न बाँकी छ। उनीहरूले भोलिको बैठकमा आफ्नो धारणा राखेपछि मात्र प्रस्तावित कार्यविभाजन र अन्य एजेन्डाहरूमाथि औपचारिक निर्णय लिइनेछ।

एघारौँ महाधिवेशनपछिको नेताहरूको स्थायी जिम्मेवारी बाँडफाँट र पार्टी पुनर्गठनको ठोस खाका तयार पार्न यो बैठक महत्त्वपूर्ण मानिएको छ। सचिवालयको अर्को बैठक भोलि (आइतबार) बिहान ११:३० बजे पुनः ओली निवासमै बस्ने तय भएको छ। भोलिको बैठकले नेताहरूको कार्यविभाजनलाई अन्तिम रूप दिने अपेक्षा गरिएको छ।