काठमाडौँ, २४ असार । वर्षायामको सुरुवातसँगै बढ्दो विद्युत् अवरुद्ध (ट्रिपिङ) को समस्यालाई समाधान गर्न ऊर्जा, जलस्रोत तथा सिँचाइ मन्त्रालयले ‘विशेष अभियान’ सुरु गरेको छ। उपभोक्ताहरूले बारम्बार खेप्नुपरिरहेको ‘झ्याप्प-झ्याप्प’ बत्ती जाने समस्यालाई स्थायी रूपमा न्यूनीकरण गरी विद्युत् आपूर्तिलाई भरपर्दो बनाउन मन्त्रालयले सक्रियता देखाएको हो।

ऊर्जामन्त्री बिराजभक्त श्रेष्ठको सचिवालयका अनुसार, मनसुनका कारण विद्युत् प्रसारण र वितरण प्रणालीमा आउन सक्ने प्राविधिक अवरोधलाई तत्काल सम्बोधन गर्न नेपाल विद्युत् प्राधिकरणलाई तयारी अवस्थामा राखिएको छ। यसका लागि आवश्यक प्राविधिक जनशक्ति र उपकरणहरूलाई २४ सै घण्टा ‘अलर्ट’ रहने गरी परिचालन गरिएको छ।

मन्त्रालयले वर्षा र हावाहुरीका कारण रुख ढल्ने, पोलमा क्षति पुग्ने वा ट्रान्सफर्मरमा आउने समस्यालाई समाधान गर्न उच्च प्राथमिकता दिएको छ। यस अभियानले विशेष गरी वितरण प्रणालीमा देखिने साना-मसिना प्राविधिक समस्यालाई तत्काल पहिचान गरी विद्युत् सेवालाई नियमित बनाउने लक्ष्य राखेको छ।

विद्युत् आपूर्तिमा कुनै पनि प्रकारको अवरोध आएमा वा गुनासो भएमा उपभोक्ताहरूले तत्काल सम्पर्क गर्न सक्ने व्यवस्था मिलाइएको छ। मन्त्रालयले निम्न निःशुल्क नम्बरहरूमा सम्पर्क गर्न अनुरोध गरेको छ:
११५०
११५१