हुम्लामा लागूऔषध नियन्त्रण र सीमा व्यापार बारे सुरक्षा समितिको बैठक

काठमाडौँ, कार्तिक १३ ।  हुम्लामा लागूऔषधको बिक्रीवितरण, सेवन र ओसारपसार नियन्त्रणका लागि सुरक्षा समितिसहित सरोकारवाला निकायका प्रतिनिधिबीच एक महत्वपूर्ण बैठक सम्पन्न भएको छ । जिल्ला प्रशासन कार्यालय हुम्लामा प्रमुख जिल्ला अधिकारी टेककुमार रेग्मीको अध्यक्षतामा बसेको बैठकले लागूऔषध नियन्त्रणका लागि विभिन्न सचेतनामूलक कार्यक्रम सञ्चालन गर्ने निर्णय गरेको हो ।

बैठकले जिल्ला प्रहरी कार्यालयले सबै स्थानीय तहसँग समन्वय गरी विद्यालय, क्याम्पस, वडा र टोलमा लागूऔषध नियन्त्रणसम्बन्धी जनचेतनामूलक कार्यक्रमलाई तीव्रता दिने निर्णय गरेको छ । साथै, जिल्लाभित्र लागूऔषधको प्रयोग नियन्त्रण गर्न सुरक्षा निकायबीच समन्वय र सहकार्य गर्ने निर्णय पनि भएको जिल्ला प्रशासन कार्यालयले जनाएको छ ।

प्रमुख जिल्ला अधिकारी रेग्मीका अनुसार, जिल्लामा रहेका रेडियो तथा अन्य सञ्चारमाध्यमबाट लागूऔषधको प्रयोगले हुने हानी र नियन्त्रणका सम्बन्धमा जनचेतनामूलक कार्यक्रम सञ्चालन गर्ने निर्णय पनि बैठकले गरेको छ । बैठकमा नेपाल–चीन व्यापारका लागि सीमा अनुमतिपत्रका विषयमा पनि छलफल भएको थियो। चीनको ताक्लाकोट र सीमा क्षेत्रमा व्यापार, व्यवसाय गर्न चाहनेले अन्य क्षेत्रबाट हुम्लामा बसाइँसराइ गरेको कागज पेस गर्नुपर्ने निर्णय भएको छ ।

अन्य निर्णयहरूमा अन्य जिल्लाबाट जारी गरिएको नागरिकता स्पष्ट बुझिने हुनुपर्ने, नागरिकता अन्य निकायमा पेस गर्न मिल्ने हुँदासम्म प्रतिलिपि जारी नगर्ने, र नागरिकता प्रतिलिपि जारी गर्दा एकल बसाइँसराइ गरी आउने परिवारको सदस्यबाट सनाखत गराउनुपर्ने रहेका छन् ।बैठकमा विभिन्न पार्टीका प्रतिनिधि, नागरिक समाज, पत्रकार, स्थानीय सरकारका प्रतिनिधि र चीनको ताक्लाकोटका प्रतिनिधिको सहभागिता रहेको थियो ।