अमेरिका र इरानबीच तत्कालका लागि दोहोरो आक्रमण रोक्ने सहमति, मङ्गलबार कतारमा पुनः वार्ता हुने
एजेन्सी, १५ असार । सैन्य तनाव चरम उत्कर्षमा पुगेकै बेला संयुक्त राज्य अमेरिका र इरानबीच एकअर्कामाथि भइरहेको हवाई तथा मिसाइल आक्रमण तत्कालका लागि रोक्ने सहमति भएको छ। मध्यपूर्वमा जारी द्वन्द्व अन्त्य गर्नका लागि आगामी मङ्गलबार कतारको राजधानी दोहामा दुई देशबीच पुनः उच्चस्तरीय कूटनीतिक वार्ता सुचारु हुने अमेरिकी अधिकारीहरूले आइतबार राति जानकारी दिएका हुन्।
अन्तर्राष्ट्रिय सञ्चारमाध्यम ‘एएफपी’ लाई इमेलमार्फत जानकारी दिँदै एक अमेरिकी अधिकारीले सम्झौताका सबै क्षेत्रमा प्राविधिक वार्ता जारी रहने स्पष्ट पार्नुभएको छ। उहाँका अनुसार दुवै पक्षले तत्कालका लागि सैन्य हमला रोकेका छन् र रणनीतिक रूपमा महत्त्वपूर्ण जलमार्ग होर्मुजमा जहाजहरू स्वतन्त्र रूपमा आवतजावत गर्न सक्नेछन्। यस्तै, अमेरिकी सञ्चारमाध्यमहरू ‘एक्पिओस’ र ‘सीएनएन’ ले पनि ट्रम्प प्रशासनका अधिकारीहरूलाई उद्धृत गर्दै मङ्गलबारदेखि कतारको दोहामा थप प्राविधिक विषयहरूमा द्विपक्षीय छलफल सुरु हुने पुष्टि गरेका छन्।
गत जुन १७ मा दुई देशबीच भएको संवेदनशील समझदारी पत्रका बावजुद पछिल्ला दिनहरूमा अमेरिकी र इरानी सेनाले एकअर्कामाथि भीषण आक्रमण गरेका थिए। गत फेब्रुअरीको अन्त्यतिर सुरु भएको यस सैन्य द्वन्द्वले महत्वपूर्ण हर्मुज जलडमरुको व्यापारिक ढुवानीलाई नराम्ररी प्रभावित पारेको छ। पूर्वप्रारम्भिक समझदारी अनुसार तेहरानले व्यावसायिक जहाजहरूलाई सुरक्षित आवतजावत गर्न दिने प्रतिबद्धता जनाएको थियो भने वासिङ्टनले इरानी बन्दरगाहमाथि लगाएको नाकाबन्दी हटाउने सहमति गरेको थियो।
यसअघि आइतबार बिहान मात्रै अमेरिकी सेनाले व्यावसायिक जहाजहरूमाथि इरानी खतरा कायम रहेको भन्दै १० वटा इरानी सैन्य अखडामा घातक आक्रमण गरेको थियो भने इरानले पनि कुवेत र बहराइनमा रहेका अमेरिकी सैन्य शिविरहरूमा जवाफी क्षेप्यास्त्र प्रहार गरेको थियो। पाकिस्तानले मध्यस्थता गरेको यस शान्ति सम्झौता उल्लंघन भएको भन्दै दुवै देशले एकअर्कालाई आरोप लगाउँदै आएका छन्।
यसैबीच, अमेरिकी राष्ट्रपति डोनाल्ड ट्रम्पले इरानी हमला जारी रहेमा सैन्य कारबाही गर्ने चेतावनी दोहोर्याउँदै शनिबार मात्रै अमेरिका बाध्य भएर युद्धमा होमिनुपरेमा इरानको अस्तित्व नै समाप्त पारिदिने धम्की दिनुभएको थियो।
