विद्युत् खपत बढाउन निजी क्षेत्रसँग सहकार्य गर्ने मन्त्रीको प्रतिबद्धता, ‘पिपिए’ र ‘ह्विलिङ चार्ज’मा जोड
काठमाडौँ, १ वैशाख । ऊर्जा, जलस्रोत तथा सिँचाइमन्त्री विराज भक्त श्रेष्ठ र नेपाल उद्योग परिसङ्घ (सीएनआई) का पदाधिकारीहरूबीच मुलुकको ऊर्जा क्षेत्रको विकास र विद्युत् खपत रणनीतिका सम्बन्धमा सोमबार विशेष छलफल भएको छ। मन्त्रालयमा भएको उक्त भेटवार्तामा ऊर्जा क्षेत्रको वर्तमान अवस्था र भावी कार्ययोजनाका विषयमा घनीभूत छलफल भएको हो।
सो अवसरमा मन्त्री श्रेष्ठले ऊर्जा क्षेत्रको समग्र विकासका लागि सरकार निजी क्षेत्रसँग हातमा हात मिलाएर अघि बढ्न तयार रहेको बताउनुभयो। उहाँले विद्युत् निर्यातको पाटो जस्तै आन्तरिक खपत वृद्धि गर्नु सरकारको मुख्य प्राथमिकता रहेको उल्लेख गर्दै यसका लागि ठोस गृहकार्य भइरहेको जानकारी दिनुभयो।
“हामीले जलाशययुक्त र नवीकरणीय ऊर्जालाई उच्च प्राथमिकतामा राखेका छौँ,” मन्त्री श्रेष्ठले भन्नुभयो, “ऊर्जा क्षेत्रले कुल गार्हस्थ्य उत्पादन (जीडीपी) मा कसरी आफ्नो योगदान बढाउन सक्छ भन्ने विषयमा हामी निजी क्षेत्रबाट स्पष्ट र व्यावहारिक सुझावको अपेक्षा गर्दछौँ।”
छलफलका क्रममा परिसङ्घका अध्यक्ष वीरेन्द्रराज पाण्डेले विद्युत् खपत बढाउन नीतिगत सुधारको खाँचो रहेको औँल्याउनुभयो। उहाँले उद्योगहरूले आफ्नै लागि आवश्यक ऊर्जा उत्पादन गरी ‘ह्विलिङ चार्ज’ (प्रसारण शुल्क) तिरेर प्राधिकरणको प्रसारण लाइनमार्फत लैजान पाउने व्यवस्था कार्यान्वयन गर्न सुझाव दिनुभयो।
अध्यक्ष पाण्डेले राख्नुभएका मुख्य मागहरू निम्न रहेका छन्:
व्यापार अनुमति: निजी क्षेत्रलाई विद्युत्को आन्तरिक तथा अन्तर्राष्ट्रिय व्यापारका लागि कानुनी बाटो खोल्नुपर्ने।
पिपिए सुचारु: सर्भे सम्पन्न भई विद्युत् खरिद सम्झौता (पिपिए) को पर्खाइमा रहेका सबै आयोजनासँग तत्काल सम्झौता प्रक्रिया अघि बढाउनुपर्ने।
इन्धन प्रतिस्थापन: उद्योगहरूमा प्रयोग भइरहेको जीवाष्म इन्धन (कोइला, डिजेल आदि) लाई विद्युतीय उपकरणले विस्थापित गर्न विशेष सहुलियतको व्यवस्था गर्नुपर्ने।
नवीकरणीय ऊर्जा: वैकल्पिक ऊर्जाका स्रोतहरूको प्रवर्द्धनमा थप जोड दिनुपर्ने।
भेटमा परिसङ्घका प्रतिनिधिहरूले ऊर्जा क्षेत्रमा लगानीमैत्री वातावरण बनेमा निजी क्षेत्रले अझ ठूला आयोजनाहरूमा लगानी बढाउन सक्ने धारणा राखेका थिए। मन्त्री श्रेष्ठले व्यवसायीहरूका सुझावलाई सकारात्मक रूपमा लिँदै नीतिगत समस्या समाधानका लागि मन्त्रालयले आवश्यक पहल गर्ने आश्वासन दिनुभयो।
