गोरखा ।  अविरल वर्षासँगै आएको बाढीले उत्तरी गोरखाको मनास्लु पदमार्ग पूर्ण रूपमा अवरुद्ध भएको छ। बुधबार बिहान बूढीगण्डकी र थेराङ खोलामा आएको बाढीले दुईवटा महत्त्वपूर्ण पुल र दुईवटा लघुजलविद्युत् आयोजना बगाएपछि पदमार्ग ठप्प भएको हो।

बाढीले भौतिक पूर्वाधारमा ठूलो क्षति पुर्‍याएपछि जिल्ला प्रशासन कार्यालय गोरखाले अर्को सूचना जारी नभएसम्मका लागि मनास्लु पदमार्ग र लार्केपास यात्रामा रोक लगाएको छ। सहायक प्रमुख जिल्ला अधिकारी नेत्रप्रसाद शर्माका अनुसार सुरक्षा संवेदनशीलतालाई ध्यानमा राख्दै पदयात्रामा रहेका र यात्राको तयारीमा रहेका सबैलाई तत्कालका लागि रोकिएको हो।

भौतिक पूर्वाधारमा क्षति, सञ्चार र विद्युत् अवरुद्ध
चुमनुब्री गाउँपालिका–४ स्थित नाम्रुङमा बूढीगण्डकी र थेराङ खोलाको बहाव बढेपछि आएको बाढीले स्थानीय पुलहरू बगाएको छ। पुल बगाएसँगै स्थानीय बासिन्दा र पदयात्रामा रहेका पर्यटकहरू बीचमै अलपत्र परेका छन्। स्थानीय लाक्पा डुन्डुपले दिएको जानकारीअनुसार गाउँबाट माथि जाने र तल आउने दुवैतर्फका पुल बगेकाले आवागमन पूर्ण रूपमा बन्द भएको छ।

बाढीले दुईवटा लघुजलविद्युत् आयोजनामा समेत क्षति पुर्‍याएपछि त्यस क्षेत्रमा विद्युत् र सञ्चार सेवा अवरुद्ध भएको छ। विद्युतीय उपकरणहरू चल्न छोडेकाले स्थानीयको जनजीवन थप कष्टकर बनेको छ। यद्यपि, हालसम्म कुनै मानवीय क्षतिको विवरण भने प्राप्त भएको छैन।

पर्यटन सिजन प्रभावित हुने जोखिम
शरद ऋतु (असोज–कात्तिक) को पदयात्रा र आरोहण सिजन सुरु हुनै लाग्दा पदमार्ग अवरुद्ध भएपछि पर्यटन व्यवसायीहरू चिन्तित बनेका छन्। पर्यटन विभागका अनुसार यस वर्ष मनास्लु हिमाल आरोहणका लागि मात्र २९ टोलीका ३ सय ४८ आरोहीले अनुमति लिइसकेका छन्।

लार्केपासका लागि निस्किएका सयौँ पर्यटकहरू पुल नहुँदा बाटोमै रोकिनुपर्ने अवस्था सिर्जना भएको छ। प्रशासनले मौसममा सुधार नआएसम्म र वैकल्पिक मार्गको व्यवस्था नभएसम्म जोखिमपूर्ण यात्रा नगर्न सबैमा आग्रह गरेको छ। बाढीको सतह घटेपछि क्षतिको विस्तृत विवरण संकलन गरिने र पदमार्ग पुन: सञ्चालनका लागि पहल गरिने प्रशासनले जनाएको छ।