मनाङ, १२ माघः आगामी फागुन २१ गते हुने प्रतिनिधिसभा सदस्य निर्वाचनमा हिमाली जिल्ला मनाङमा प्रत्यक्षतर्फ तीन वटा निर्वाचन चिह्नमा मात्र मतदान हुने भएको छ ।

मुख्य निर्वाचन अधिकृतको कार्यालयका अनुसार निर्वाचनमा नेपाली कांग्रेसको रुख, नेपाल कम्युनिष्ट पार्टीको रातो तारा र मङ्गोल नेशनल अर्गनाइजेसनको भाले चिह्नमा मतदान हुने भएको हो ।

सुरुमा पाँच दलबाट उम्मेदवारी परेकामा नेकपा (एमाले) र राष्ट्रिय प्रजातन्त्र पार्टी (राप्रपा) ले नेपाली कांग्रेसलाई समर्थन गर्दै उम्मेदवारी फिर्ता लिएपछि मतपत्रमा तीन वटा चिह्न मात्र कायम भएको मुख्य निर्वाचन अधिकृत रामप्रसाद पौडेलले जानकारी दिनुभयो ।

निर्वाचनमा नेपाली कांग्रेसका टेकबहादुर गुरुङ, नेकपाका यशोदा सुवेदी गुरुङ र मङ्गोल नेसनल अर्गनाइजेसनका रामबहादुर गुरुङ ‘नवीन’ चुनावी प्रतिस्पर्धामा हुनुहुन्छ ।

प्रतिनिधिसभाका लागि एक मात्र निर्वाचन क्षेत्र रहेको मनाङमा सात हजार मतदाता रहेका छन्, जुन देशकै सबैभन्दा कम मतदाता सङ्ख्या हो । निर्वाचनका लागि जिल्लामा एक अस्थायीसहित २९ मतदान केन्द्र निर्धारण गरिएको छ । निर्वाचन सम्पन्न गर्न जिल्लाभर एक सय ७१ कर्मचारी खटाइएको मुख्य निर्वाचन अधिकृतको कार्यालयले जनाएको छ ।