पश्चिमी र स्थानीय वायुको प्रभाव : पहाडी भू-भागमा वर्षा र हिमाली क्षेत्रमा हिमपातको सम्भावना

काठमाडौँ,  चैत २८ । नेपालमा हाल पश्चिमी वायुका साथै स्थानीय वायुको आंशिक प्रभाव देखिएका कारण देशका विभिन्न भागमा मौसममा परिवर्तन आएको छ । जल तथा मौसम पूर्वानुमान महाशाखाका अनुसार यसको प्रभावले विशेष गरी पहाडी तथा हिमाली क्षेत्रको जनजीवन प्रभावित हुन सक्ने देखिएको छ ।

हाल कोशी, बागमती र गण्डकी प्रदेशका पहाडी तथा हिमाली भू-भागमा साधारणतया बदली रहेको छ भने देशका अन्य पहाडी क्षेत्रमा आंशिक बदलीको अवस्था छ । तराई क्षेत्रमा भने मौसम मुख्यतया सफा रहेको महाशाखाले जनाएको छ ।

महाशाखाद्वारा जारी बुलेटिन अनुसार आज दिउँसो कोशी, गण्डकी, कर्णाली र सुदूरपश्चिम प्रदेशका हिमाली भेगका केही स्थानमा मेघगर्जन र चट्याङसहित हल्का वर्षा तथा हिमपातको सम्भावना रहेको छ । कोशी प्रदेशको तराई क्षेत्र र अन्य पहाडी भागमा आंशिक बदली रहने प्रक्षेपण गरिएको छ । साथै, लुम्बिनी र सुदूरपश्चिम प्रदेशका तराईका केही स्थानमा हावाहुरी चल्ने सम्भावना रहेकाले सचेत रहन आग्रह गरिएको छ ।

आज राति पनि कोशी, गण्डकी र कर्णाली प्रदेशका हिमाली क्षेत्रका केही स्थानहरूमा हल्का वर्षा र हिमपातको क्रम जारी रहने पूर्वानुमान छ । कोशी र गण्डकी प्रदेशका पहाडी भू-भागका एक-दुई स्थानमा समेत मेघगर्जनसहित हल्का वर्षा हुन सक्ने महाशाखाले जनाएको छ ।

वर्षा, हिमपात र हावाहुरीको सम्भावना रहेका क्षेत्रमा हुन सक्ने जोखिमलाई मध्यनजर गर्दै महाशाखाले सर्वसाधारण तथा यातायात सञ्चालकहरूलाई आवश्यक सतर्कता अपनाउन विशेष अनुरोध गरेको छ ।