एमालेको ऐतिहासिक निर्णय: बल्खुस्थित मदननगरमै बन्ने भयो अत्याधुनिक केन्द्रीय कार्यालय

भक्तपुर, ११ जेठ । नेकपा (एमाले) ले काठमाडौँको बल्खुस्थित मदननगरमा आफ्नै अत्याधुनिक केन्द्रीय कार्यालय भवन निर्माण गर्ने निर्णय गरेको छ। आइतबार भक्तपुरको गुण्डुमा सम्पन्न पार्टीको केन्द्रीय सचिवालय बैठकले आफ्नै थातथलोमा केन्द्रीय कार्यालय फर्काउने ऐतिहासिक निर्णय लिएको हो।

वि.सं. २०७२ सालको विनाशकारी भूकम्पका कारण बल्खुस्थित तत्कालीन केन्द्रीय कार्यालय भवन क्षतिग्रस्त भएपछि एमालेले लामो समयदेखि भाडाका भवन र अस्थायी संरचनाबाट पार्टीका गतिविधि सञ्चालन गर्दै आएको थियो। भूकम्पपछि एमालेले धुम्बाराही, थापाथली र हाल ललितपुरको च्यासलस्थित तुलसीलाल स्मृति प्रतिष्ठानबाट केन्द्रीय कार्यालय सञ्चालन गरिरहेको छ।

पार्टीका उपमहासचिव लेखराज भट्टका अनुसार, सचिवालय बैठकले मदननगर बल्खुमा रहेको पार्टीकै जग्गामा सबै सुविधासम्पन्न नयाँ भवन बनाउने प्रस्तावलाई अनुमोदन गरेको हो। “लामो समयको अन्योलपछि अब हामी आफ्नै ऐतिहासिक भूमिमा फर्कने भएका छौँ,” उहाँले भन्नुभयो।

मदन भण्डारीको स्मृतिसँग जोडिएको मदननगरलाई एमालेका कार्यकर्ताहरूले भावनात्मक आस्थाको केन्द्र मान्दै आएका छन्। आफ्नै स्वामित्वको जग्गामा अत्याधुनिक भवन बन्ने भएपछि एमालेको प्रशासनिक कार्य सहज हुने र संगठनमा नयाँ उत्साह थपिने विश्वास लिइएको छ। भवन निर्माणको प्रक्रिया छिट्टै सुरु गरिने समेत पार्टीले जनाएको छ।