गण्डकी प्रदेशसभामा आगामी आर्थिक वर्षको बजेटमाथि छलफल सुरु

काठमाडौँ, असार ४ । गण्डकी प्रदेशसभाको शुक्रबारको बैठकमा आगामी आर्थिक वर्ष २०८३/८४ को बजेटमाथि सैद्धान्तिक छलफल सुरु भएको छ। प्रदेशका आर्थिक मामिलामन्त्री जितबहादुर शेरचनले ‘आगामी आर्थिक वर्षको बजेटमाथि छलफल गरियोस्’ भनी प्रस्ताव पेस गरेसँगै सांसदहरूले आफ्नो धारणा राख्न सुरु गरेका हुन् ।

पुँजीगत खर्च र उत्पादनमा जोड
छलफलमा भाग लिँदै सांसदहरूले बजेटको संरचना र प्राथमिकताका विषयमा मिश्रित प्रतिक्रिया दिएका छन्। सांसद अशोककुमार श्रेष्ठले अघिल्ला वर्षहरूको तुलनामा चालु खर्च घट्नु र पुँजीगत (विकास) खर्च बढ्नु बजेटको सकारात्मक पक्ष भएको बताउनुभयो। उहाँले बजेटमा समावेश रोजगारी सिर्जना, लगानी प्रवर्द्धन र कृषिको बजारीकरण जस्ता कार्यक्रमहरू कागजमा मात्र सीमित नभई प्रभावकारी कार्यान्वयन हुनुपर्नेमा जोड दिनुभयो ।

सांसद लिलबहादुर थापा मगरले नागरिकको माग र आवश्यकतालाई बजेटले सम्बोधन गर्ने प्रयास गरेको उल्लेख गर्दै बजेट निर्माण र वितरण प्रक्रियालाई थप प्रणालीगत बनाउन सुझाव दिनुभयो ।

राजस्व वृद्धि र औद्योगिक क्षेत्रको चर्चा
छलफलका क्रममा सांसद रेशमबहादुर जुग्जालीले प्रदेशको न्यून आन्तरिक राजस्वका कारण ‘घाटा बजेट’ ल्याउनुपर्ने बाध्यता रहेको औँल्याउनुभयो । उहाँले लामो समयदेखि घोषणा गरिएका लोकाहाखोला र पूँडीटार औद्योगिक क्षेत्रको निर्माण कार्यलाई तीव्रता दिन सरकारको ध्यानाकर्षण गराउनुभयो ।

त्यसैगरी, सांसद बिन्दु पौडेलले ‘रिटर्न टु भिलेज’ जस्ता उत्पादनमुखी र रोजगारीमूलक कार्यक्रमको प्रशंसा गर्दै पुँजीगत बजेट समयमै खर्च हुन नसक्ने परिपाटीको अन्त्य हुनुपर्ने धारणा राख्नुभयो ।

नीति तथा कार्यक्रमसँगको तादात्म्यता
सांसद पार्वती तामाङले सरकारले ल्याएको नीति तथा कार्यक्रमकै आधारमा बजेट आएको भन्दै नवप्रवर्तन, उद्यमशीलता र लगानी प्रवर्द्धनलाई प्राथमिकता दिनु राम्रो पक्ष भएको बताउनुभयो ।

छलफलमा सांसदहरू सीताकुमारी सुन्दास, महेश भट्टराई र भक्तबहादुर कुँवर लगायतले पनि भाग लिँदै बजेटका सबल र सुधार गर्नुपर्ने पक्षहरूबारे आ–आफ्नो धारणा राख्नुभएको थियो। बजेटमाथिको छलफल आगामी बैठकहरूमा पनि जारी रहने जनाइएको छ ।