त्रिशूली र नारायणी नदीमा ६४ शव फेला : शवगृह भरिएपछि व्यवस्थापनमा चुनौती

काठमाडौँ, भदौ ११ । चीनको स्वशासित क्षेत्र तिब्बतबाट सुरु भएको बाढी भोटेकोशी हुँदै त्रिशूली र नारायणी नदीमा आएपछि हालसम्म ६४ वटा शव फेला परेका छन् । अविरल वर्षा र बाढीसँगै बगेर आएका यी शवहरू नदी किनारका विभिन्न स्थानमा फेला परेका हुन् ।

जिल्ला प्रहरी कार्यालय चितवनका प्रमुख प्रहरी उपरीक्षक (एसपी) रामेश्वर पौडेलका अनुसार फेला परेका शवहरूमध्ये कतिपय सग्लो अवस्थामा छन् भने कतिपय शरीरका अङ्गहरू मात्र रहेका छन् । फेला परेका सबै शवहरूलाई परीक्षण र पहिचानका लागि भरतपुर अस्पतालको शवगृहमा राखिएको छ ।

शवगृहमा स्थान अभाव
शवको संख्या अत्यधिक भएपछि व्यवस्थापनमा गम्भीर समस्या देखिएको छ। छिमेकी जिल्ला तनहुँमा फेला परेका नौवटा शवलाई परीक्षणका लागि चितवन पठाइए तापनि यहाँको शवगृहमा ठाउँ नभएपछि पुनः तनहुँ नै फिर्ता पठाइएको एसपी पौडेलले जानकारी दिनुभयो ।

खोजी कार्य र वैकल्पिक व्यवस्था
नदी किनारमा थप शवहरू हुनसक्ने सम्भावनालाई मध्यनजर गर्दै नेपाल प्रहरी, सशस्त्र प्रहरी बल र नेपाली सेनासहितका तीनवटै सुरक्षा निकायले खोजी कार्यलाई तीव्रता दिएका छन् ।

भरतपुर अस्पतालको शवगृह भरिएकाले अब फेला पर्ने शवहरूलाई राख्नका लागि वैकल्पिक स्थानको खोजी सुरु गरिएको छ। प्रहरीका अनुसार आगामी दिनमा भेटिने शवहरूलाई औद्योगिक प्रतिष्ठानको कार्यालय वा अन्य उपयुक्त स्थानमा व्यवस्थापन गर्ने गरी तयारी अगाडि बढाइएको छ ।