म्याग्दीमा नवदम्पतीको उदाहरणीय कार्य : बिहेभोजको खर्चबाट गाउँमा सडकबत्ती जडान

काठमाडौँ, जेठ ४ । म्याग्दीको मङ्गला गाउँपालिका-२ कोत्रवाङका एक नवदम्पतीले विवाहको फजुल खर्च कटाएर सामाजिक कार्यमा लगानी गर्दै समाजका लागि नयाँ सन्देश दिएका छन् । हालै वैवाहिक बन्धनमा बाँधिएका प्रकाश खत्री र राधिका धिताल खत्रीले विवाहभोजमा हुने खर्च बचाएर आफ्नो टोलमा सडकबत्ती जडान गर्नुभएको हो ।

सुरक्षा र सहजतामा वृद्धि
सडकबत्ती जडान भएपछि कोत्रवाङ क्षेत्रमा रातको समयमा हुने हिँडडुल सुरक्षित र सहज बनेको छ । कोत्रवाङ टोल सुधार संस्थाका अध्यक्ष पूर्णबहादुर विश्वकर्माका अनुसार बत्ती जडानसँगै गाउँमा चितुवा लगायतका वन्यजन्तुको त्रास कम भएको छ । “बस्ती झलमल्ल भएपछि वन्यजन्तुको आवतजावत घटेको छ, जसले गर्दा स्थानीयले सुरक्षित महसुस गरेका छन्,” उहाँले भन्नुभयो ।

सहयोगको विवरण
स्थानीय टोल सुधार समिति र बिहानी आमा समूहको आग्रहलाई स्वीकार गर्दै नवदम्पतीले व्यक्तिगत खर्चमा १४ वटा ३० वाट र तीनवटा ५० वाट क्षमताका स्वचालित सडकबत्ती उपलब्ध गराउनुभएको हो। यसका साथै आवश्यक तार र अन्य सामग्री पनि उहाँहरूले नै प्रदान गर्नुभएको हो । मङ्गला गाउँपालिकाले यस अभियानका लागि थप तीनवटा पोल उपलब्ध गराएर सहयोग गरेको छ ।

जडान गरिएका यी बत्तीहरू ‘सेन्सर’ प्रविधियुक्त भएकाले रात परेपछि आफैँ बल्ने र उज्यालो भएपछि स्वतः निभ्ने गर्दछन् । सिम, कोत्रवाङ, कुहुँ जाने सडकदेखि काफलचौरको झोलुङ्गे पुलसम्मको क्षेत्रमा यी बत्तीहरू जडान गरिएको छ ।

सामाजिक सेवामा खत्री परिवार
सामाजिक कार्यमा खत्री परिवारको यो पहिलो योगदान भने होइन। यसअघि प्रकाशका बुबा चित्रबहादुर र दाजु विकास खत्रीले कोत्रवाङदेखि ताराखेत जोड्ने पदमार्ग निर्माण गरी गाउँलेलाई ठुलो गुन लगाउनुभएको थियो। अहिले प्रकाश र राधिकाले गरेको यो कार्यले खत्री परिवारको सामाजिक सेवाको विरासतलाई थप उचाइ दिएको छ ।

२२ घरधुरीको बसोबास रहेको कोत्रवाङमा नवदम्पतीको यो सत्कर्मले फजुल खर्च नियन्त्रण गरी समाज विकासमा लाग्न अरूलाई पनि प्रेरित गरेको छ ।