थाइल्याण्डको बैंककमा रेल र बस ठोक्किँदा ८ जनाको मृत्यु, ३५ भन्दा बढी घाइते

बैंकक (एजेन्सी), २ जेठ ।  थाइल्याण्डको राजधानी बैंककको केन्द्र भागमा पर्ने एक ‘एयरपोर्ट रेल लिंक’ स्टेशन नजिकै एउटा मालबहाक रेलले सार्वजनिक बसलाई ठक्कर दिँदा कम्तीमा आठ जनाको मृत्यु भएको छ। शनिबार दिउँसो भएको यस भयावह दुर्घटनामा परी ३५ जना भन्दा बढी घाइते भएका छन्।

अन्तर्राष्ट्रिय समाचार एजेन्सी एएफपीका अनुसार, बैंकक प्रहरी प्रमुख उरुमपोर्न कुनदेजसुम्रितले दुर्घटनामा कम्तीमा ३५ जना घाइते भएको र उनीहरूलाई उपचारका लागि नजिकैका अस्पतालहरूमा पठाइएको पुष्टि गरेका छन्। सहरको आपत्कालीन सेवा प्रदायक ‘एरावन मेडिकल सेन्टर’ले मृत्यु हुनेको संख्या पुष्टि गरेको छ।

घटनास्थलमा पुगेका उप–यातायात मन्त्री सिरीपोङ अङकासाकुलकिएतले सञ्चारकर्मीहरूसँग बोल्दै सबै मृतकका शव बसभित्रै फेला परेको जानकारी दिए। दुर्घटनाका बेला बसमा जम्मा कति यात्रु सवार थिए भन्ने अझै स्पष्ट हुन सकेको छैन।

अल जजीराका प्रतिनिधि टोनी चेङले बैंककबाट दिएको जानकारी अनुसार यो दुर्घटना स्थानीय समय अनुसार दिउँसो ३:४० (नेपाली समय अनुसार करिब २:२५) बजे भएको थियो। प्रत्यक्षदर्शी र प्रारम्भिक रिपोर्टका अनुसार, रेल क्रसिङको सुरक्षा अवरोध (ब्यारियर) तल झरेपछि पनि बस रेलमार्गको बीचमै अड्किएको देखिएको थियो।

एउटा तीव्र गतिको मालबहाक रेलले रोकिइराखेको बसलाई जोडले ठक्कर दिएको थियो। रेलले बसलाई केही परसम्म घिसार्दै लैजाँदा नजिकै रहेका अन्य सवारी साधनहरू पनि चपेटामा परेका थिए। ठक्कर लगत्तै बसमा भीषण आगलागी भएको थियो, जसले गर्दा उद्धार कार्यमा कठिनाइ भएको थियो।

दुर्घटनाको प्रकृतिबारे बोल्दै मन्त्री सिरीपोङले बस रेलको ट्रयाकमा किन रोकिएको थियो वा सुरक्षा ब्यारियरमा समस्या थियो भन्नेबारे अहिल्यै केही भन्न नसकिने र यसबारे विस्तृत अनुसन्धान भइरहेको बताए।

घटना लगत्तै अग्नि नियन्त्रक र उद्धारकर्मीहरू परिचालन गरिएका थिए। सामाजिक सञ्जालमा सार्वजनिक भएका तस्बिरहरूमा रेल स्टेशन नजिकै धुवाँको मुस्लो उडिरहेको र दर्जनौँ उद्धारकर्मीहरू भग्नावशेषबाट मानिसहरू निकाल्न व्यस्त रहेको देखिन्छ।

थाइल्याण्डका प्रधानमन्त्री अनुतिन चर्नविराकुलले यस घटनाप्रति दुःख व्यक्त गर्दै तत्काल छानबिन गर्न आदेश दिएका छन्। अहिले आगो नियन्त्रणमा आइसकेको छ र उक्त क्षेत्रमा यातायात व्यवस्था सहज बनाउने प्रयास भइरहेको छ।