विद्यार्थी छात्रावासमा युक्रेनी हमलाको आरोप लगाउँदै पुटिनले दिए बदला लिने चेतावनी

मस्को/किएभ, ९ जेष्ठ । रूसी राष्ट्रपति भ्लादिमिर पुटिनले युक्रेनद्वारा नियन्त्रित पूर्वी क्षेत्रको एक विद्यार्थी छात्रावासमा भएको घातक आक्रमणको बदला लिने चेतावनी दिएका छन्। उक्त आक्रमणमा परी ६ जनाको मृत्यु भएको र ३९ जना घाइते भएको रुसको दाबी छ।

लुहान्स्क क्षेत्रको स्टारोबिल्स्क सहरमा रातभर भएको उक्त ड्रोन आक्रमणमा अन्य १५ जना बेपत्ता रहेको पुटिनले जानकारी दिए। रुसी राष्ट्रपतिले यस घटनालाई ‘निर्दोषमाथिको प्रहार’ भन्दै रुसी सेनालाई प्रतिशोधका लागि योजना (प्रस्ताव) तयार गर्न निर्देशन दिएका छन्।

परस्पर विरोधी दाबी
रुसले सो भवनमा कुनै पनि सैन्य गतिविधि नभएको दाबी गरिरहँदा युक्रेनी सेनाले भने अर्कै दाबी गरेको छ। युक्रेनका अनुसार सो आक्रमण रुसको कुलीन ‘रुबिकन’ ड्रोन सैन्य इकाइको मुख्यालयलाई लक्षित गरी गरिएको थियो। यद्यपि, रुसले दाबी गरेको छात्रावास र आफूले प्रहार गरेको मुख्यालय एउटै भवन हो वा होइन भन्नेबारे युक्रेनले स्पष्ट पारेको छैन।

क्रेमलिनमा आयोजित एक कार्यक्रममा बोल्दै पुटिनले भने, “त्यस क्षेत्रको आसपासमा कुनै पनि सैन्य सुविधाहरू वा गुप्तचर सेवाका कार्यालयहरू छैनन्। त्यसैले, हाम्रो प्रतिरक्षा प्रणालीका कारण सो भवनमा क्षति पुगेको भन्ने दाबीमा कुनै सत्यता छैन।” पुटिनका अनुसार युक्रेनले तीन चरणमा १६ वटा ड्रोन प्रयोग गरेर उक्त हमला गरेको थियो।

रुसी सरकारी टेलिभिजनले घाइतेमध्येकी एक १९ वर्षीया विद्यार्थी डियाना शोभकुनको भिडियो प्रसारण गरेको छ, जसको टाउकोमा चोट लागेको देखिन्छ। यद्यपि, मृतक भनिएका व्यक्तिहरूको कुनै तस्बिर वा भिडियो भने सार्वजनिक गरिएको छैन।

अन्य क्षेत्रमा पनि आक्रमणको शृङ्खला
शनिबार बिहान रुसी अधिकारीहरूले ब्ल्याक सी नजिकैको नोभोरोसिस्क बन्दरगाहस्थित एक तेल डिपोमा ड्रोनको भग्नावशेष खस्दा आगलागी भएको र दुई जना घाइते भएको बताएका छन्। यस्तै, अनापा सहरमा पनि ड्रोनका कारण निजी घरहरूमा क्षति पुगेको समाचार छ।

अर्कोतर्फ, युक्रेनी राष्ट्रपति भोलोडिमिर जेलेन्स्कीले बिहीबार दक्षिणी खेरसन क्षेत्रमा रुसी सुरक्षा सेवा (FSB) को मुख्यालयमा सफल आक्रमण गरिएको दाबी गरेका छन्। उक्त हमलामा करिब १०० जना रुसी ‘कब्जाधारी’ मारिएको वा घाइते भएको युक्रेनको दाबी छ। रुसी पक्षले यसबारे आधिकारिक टिप्पणी नगरे पनि क्रेमलिन निकटका टेलिग्राम च्यानलहरूले ठुलो संख्यामा क्षति भएको स्वीकार गरेका छन्।

सन् २०२२ मा युद्ध सुरु भएदेखि नै युक्रेनले रुसमाथि जानाजानी सर्वसाधारणलाई निशाना बनाएको आरोप लगाउँदै आएको छ। गत हप्ता मात्रै राजधानी किएभमा रुसी क्षेप्यास्त्र प्रहारबाट तीन बालबालिकासहित २४ जनाको मृत्यु भएको थियो। तर, रुसले सधैं नागरिक क्षेत्रमा आक्रमण गरेको कुरालाई अस्वीकार गर्दै आएको छ।(स्रोतः बीबीसी)